2024-yilga qadar sotuvga chiqarilishi kutilayotgan flagman – “iPhone 16 Pro” displey yoqilganda ko‘rinmaydigan ekran ostidagi Face ID sensorlari bilan jihozlanadi. Bu haqda Koreyaning “The Elec” nashri xabar bermoqda.

Bunday texnologiya haqidagi mish-mishlar ilk bor o‘tgan yili paydo bo‘lgan, biroq prognozlar qayta-qayta o‘zgargan – yashirin sensorlar “iPhone 14 Pro”da mavjud emas va joriy yil oxirida chiqadigan “iPhone 15”da ham ushbu funksiya bo‘lmaydi.

Kechikishning asosiy sababi shundaki, zarur texnologiyalar hali amalga oshirishga tayyor emas. Ba’zi Android qurilmalari ishlab chiqaruvchilari kameralarni displey ostida yashirishga harakat qilib ko‘rgan (masalan, ZTE), lekin ularning amalga oshirilishi kameraning tasvirga olish sifatini pasaytirdi.

“Samsung Galaxy Z Fold 3”da yashirin selfi moduli bilan bog‘liq tajriba o‘tkazilgan, biroq sensorning o‘zi displey yoqilgan va surat sifati haqida gapirilmagan taqdirda ham u ko‘rinib turadi.

Face ID nafaqat fotomodulga, balki qo‘shimcha “TrueDepth” infraqizil kamerasiga ham asoslangan va bu texnologik vazifani yanada qiyinlashtiradi. “The Verge” nashri ma’lumotlariga ko‘ra, oxir-oqibat “iPhone 16 Pro”da avvalgi modellardagi kabi selfi kamera mavjudligini ko‘rsatuvchi teshiklar qoldirilishi mumkin, ammo bu minimal bo‘ladi.

Ma’lumotlarga ko‘ra, “iPhone 16” modeli avvalgi “ajdodlari”ga qaraganda mutlaqo yangicha dizaynga ham ega bo‘lishi mumkin.

• Apple
• iPhone