“GizmoChina” jurnalistlarining xabar berishicha, og‘ir yuk ostida “iPhone 15 Pro” smartfoni korpusi Selsiy shkalasi bo‘yicha 48 darajagacha qiziydi. Bu tanani birinchi darajali kuyishga olib kelishi mumkin.

“iPhone 15 Pro” TSMC tomonidan ishlab chiqarilgan 3 nanometrli “A17 Pro” chipi asosida ishlab chiqilgan. “Apple” ma’lumotlariga ko‘ra, chip o‘z avlodi ichida eng kuchlisiga aylandi, biroq mutaxassislar yuklanish ostida u juda qizib ketishini va standart passiv sovutish har doim ham haroratni pasaytirish uchun yetarli bo‘lmasligini payqashdi.

“Insider Revegnus” X platformasida (“Twitter”) “iPhone 15 Pro”ning ish paytidagi issiqlik xaritasining suratini joylashtirdi. Qurilma prosessor hududida eng ko‘p qiziydi. Korpusning harorati Selsiy shkalasi bo‘yicha 48 darajaga yetadi. Mutaxassislarning fikricha, “Apple” prosessorni qayta ishlash quvvatini oshirish yo‘lini muvaffaqqiyatli bo‘sib o‘tdi, biroq batareya quvvati va qizib ketishni e’tiborsiz qoldirgan.

Mutaxassislar, shuningdek, uzoq vaqt davomida ta’sir qilish bilan 48 daraja harorat birinchi darajali kuyishga olib kelishi mumkinligini ta’kidladilar. Haddan tashqari issiqlik ham qurilmaning ishlashiga ta’sir qiladi. “TechTablets” YouTube kanali muallifi atigi ikki daqiqa faol ishda prosessor unumdorligi 25 foizga, 20 daqiqadan so‘ng esa GPU unumdorligi 34 foizga pasayganini ma’lum qildi.

Avvalroq, “iPhone 15 Pro Max”ning titandan yasalgan korpusi oson egilishi va tez sinishi ma’lum bo‘lgan edi. Kresh-testlarda ham aynan yangi model avvalgilariga nisbatan sifatsizroq ekani aniqlangandi.

Qayd etish mumkin, “iPhone 15” “Apple”ning o‘n yettinchi avlod gajeti hisoblanadi. Qurilma 2023-yilning 12-sentyabr kuni Kaliforniya shtati Kupertino shahridagi “Apple Park”da bo‘lib o‘tgan onlayn tadbirda taqdim etildi. Oldindan buyurtmalar 15-sentyabrdan boshlangan va bir haftadan so‘ng, 22-sentyabrda sotuvga chiqarilgan.

• Smartfon
• iPhone
• texnologiya