Bugungi kunda 30-35 yoshgacha yirik kasbiy natijalarga erishmagan boʻlsangiz, endi urinish behuda ekaniga ishonishadi. Bu borada, ayniqsa, ayollarga qiyin, ular ish va oila oʻrtasidagi muvozanatni saqlash uchun ikki baravar koʻproq harakat qilishlari kerak. Keling, qaysi yoshda yorqin karyera qurish imkoniyati koʻproq boʻlishi mumkinligini aniqlaylik.

Koʻpchiligimiz muvaffaqiyatli karyera, oʻqish, shaxsiy hayot, sport va sevimli mashgʻulotlarni qanday moslashtirish haqida oʻylaymiz. Muvaffaqiyat mezonlari haqida gapirganda, “Synergy Woman Forum” spikeri, psixologiya fanlari doktori, Skolkovo biznes maktabining oʻqituvchisi Viktoriya Shimanskaya taʼkidlaydi: “Hayotimizning har bir bosqichida bizda muvaffaqiyat toʻgʻrisida oʻz fikrimiz boʻladi, shuning uchun har qanday yoshda muvaffaqiyatga erishishingiz mumkin. Rivojlanish uchun ikki yil, uch, besh yil kerak boʻlishi mumkin, ammo bu muhim emas, balki toʻgʻri yoʻnalishda ketish – eng muhimi. Inson oʻziga nisbatan halol boʻlsa, u sevgan ishini qiladi, natijada bir necha baravar tezroq yuksaladi. Asosiysi, karyeraviy yutuqlar – soʻnggi nuqta emas, balki yoʻl ekanini anglash. Ushbu yoʻlning har bir qismida harakat baxt va zavq olib kelsa, haqiqiy muvaffaqiyat haqida gapirishimiz mumkin”. 35 yoshdan keyin muvaffaqiyatli karyera qurish imkonsiz, degan gap qanchalik toʻgʻri ekanini aniqlashga harakat qilaylik. Shaxsning kasbiy yoʻlini shartli ravishda bir necha bosqichlarga boʻlish mumkin.

20 yoshgacha

20 yoshgacha davr – oʻqish va amaliyot uchun eng samarali hisoblanadi. Bu davrda inson oilasiga ogʻirlik qilmaydi, hamma narsa uchun ochiq va yutuqlarga intilishga tayyor boʻladi. Bugun diplom bilan hech kimni ajablantirolmaysiz, shuning uchun kasbiy yoʻl boshida kamida biron bir amaliy tajribaga ega boʻlish juda muhim. Kadrlar boʻlimi mutaxassislarining aksariyati universitetda oʻqishni tugatmasdan, hech boʻlmaganda amaliyotchi sifatida yirik xalqaro kompaniyada ishlashga harakat qilishni maslahat berishadi.

20 yoshdan 30 yoshgacha

Bu yosh – oʻz tajribasidan eng yaxshisini bera oladigan ustozni topish uchun eng yaxshi davr. Hayotning ushbu davrida nafaqat rasmiy boʻysunishga, balki haqiqiy oʻqituvchini topishga erishgan boʻlsangiz, oʻzingizni juda omadli deb hisoblang. Bunday kasbiy murabbiy sizga eng muhim narsalarni olishga, keyin esa ushbu koʻnikmalarni mustaqil amaliyotda qoʻllashga imkon beradi. Ushbu oʻn yillik ichida oddiy xodimdan oʻz biznesining egasiga qadar juda uzoq yoʻlni bosib oʻtishingiz mumkin. Tajribasizlik tufayli biznes muvaffaqiyatli boʻlishi fakt emas, lekin bu yosh shu qadar ajoyibki, unda muvaffaqiyatsizliklardan tezda xalos boʻlishingiz va harakatni davom ettirishingiz mumkin.

30 yoshdan 40 yoshgacha

Muayyan maqomga ega boʻlish va mutaxassis sifatida boshqalarda taassurot shakllantirish uchun eng yaxshi vaqt. Karyeraning bu davridagi eng muhim narsa – atrofingizda yuqori sifatli maʼlumot maydonini yaratishdir.

40 yosh va undan keyin

40 yoshga kelib, inson karyerasidagi eng qiziqarli davrlardan biri boshlanadi. Ajoyib jihati shundaki, mohiyatan, barcha eshiklar oldingizda ochiq. Bu yoshga kelib yetarlicha tajriba toʻplanib qoladi va oilaviy majburiyatlarning soni kamayadi. Bunday holatda tanlagan yoʻnalishingizda rivojlanishni davom ettirishingiz yoki, hatto, rejalashtirilmagan boshqa yoʻl ochishingiz mumkin. Qirq yoshdan keyin odamlar mutlaqo yangi narsalarni qilishni boshlaganlari haqida koʻplab misollar mavjud. Masalan, bir kishi butun umri davomida huquqshunoslik sohasida ishlagan va keyinchalik professional yoga murabbiyi boʻlishga qaror qilgan.

Bu amaliyot, ayniqsa, Gʻarbda keng tarqalgan, chunki odamlar mutaassiblikdan yiroqroq. Albatta, kasbni tubdan oʻzgartirish bilan xatarlar yuzaga kelishi mumkin, ammo boshqa tomondan qarasak, nima uchun chekinish kerak? Axir 40 yoshga kelib sizda tajriba, moliyaviy yostiqcha va nisbiy erkinlik bor, demak bu – uzoq yillik orzularni roʻyobga chiqarish uchun eng qulay vaqt. Agar oldingi sohangizda qolishni afzal koʻrsangiz, murabbiylik qilish uchun eng yaxshi davr. Toʻplangan bilimlarni kam tajribali hamkasblarga uzatsangiz, kasbingizning tobora koʻproq yangi qirralarini kashf etasiz, chunki boshqalarga taʼlim berish oʻzingizning bilim olishga boʻlgan xohishingizni keltirib chiqaradi.

• Foydali
• Tavsiya
• qiziqarli