Suhbat ishga joylashishdagi eng muhim jarayon hisoblanadi. Hattoki, testlardan muvaffaqiyat bilan o‘tadigan tajribali ish qidiruvchilar ham intervyudan “yiqilishlari” mumkin. Bunday holatlardan qochish uchun rekruter (ma’lum bir lavozimlarga nomzodlarni izlaydigan mutaxassis) bilan suhbatda nafaqat tashqi ko‘rinish, balki, nutqingizga ham e’tibor berishingiz kerak. Intervyudan omadli o‘tib, ishga qabul qilinishingiz uchun qanday jumla va savollar ishlatmaslik haqida esa, quyida o‘qing.

1.  “Kompaniyangiz nima bilan shug‘ullanadi?”

Har bir ish qidiruvchi yodda saqlashi kerak bo‘lgan narsalardan biri bu – joylashmoqchi bo‘lgan joyi haqidagi ma’lumotlarni mustaqil ravishda izlash kerakligidir. Suhbat o‘tkazadigan menejer siz bilan intervyuni o‘tkazish uchun rezyumengiz bilan tanishib chiqqan, siz bilan bog‘langan va qulay vaqtni belgilagan. Siz ham uchrashuvga tayyorlanishingiz ikkala tomon uchun ham adolatli bo‘ladi. Shuningdek, bu harakatingiz bilan ish beruvchilarga ularga bildirgan qiziqishingiz va mustaqil harakatlana olishingiz mumkinligini tushuntirgan bo‘lasiz. Shu sababli ham, suhbatdan omadli o‘tish uchun avvaldan berilishi kerak bo‘lgan, o‘zingiz qiziqqan savollarni tayyorlab borish muhim hisoblanadi.

2.  “Eski boshlig‘im bilan kelisha olmas edim”

Suhbat davomida ish beruvchi avvalgi ish joyingizdan nega bo‘shaganingiz sababi bilan qiziqib qolishi mumkin. Bunday holatlarda, avvalo, hatto eski boshlig‘ingiz bilan yaxshi kelishmagan bo‘lsangiz-da, u haqida salbiy fikrlar bildirmaslik va shaxsiyatiga o‘tmaslik muhim hisoblanadi. Ular haqidagi shaxsiy salbiy fikringizni bildirgan holingizda, o‘zingiz haqingizdagi yaxshi taassurotni buzib qo‘yishingiz mumkin.

3.  “Perfeksionist va mehnatkashman”

“Juda mehnatkash va perfeksionistman” jumlasi siz yaxshi xodim ekanligingizni bildirmaydi. Aksincha, bu “men zaif tomonlarimni tan ololmayman va menda surunkali xavotir mavjud” deganidir. Unutmangki, ortiqcha mehnatkashlik va perfeksionizm ishingizni to‘g‘ri hamda yaxshi bajarishingizda xalaqit beradi. Shuningdek, bu sifatlar sizda bor ekanligi kareraviy o‘sishga tez erishasiz degani emas.

Agar sizdan salbiy sifatlaringiz haqida so‘rashsa, nafaqat kamchiliklaringiz haqida, balki ular bilan qanday kurashishingiz yoki topgan yechimlaringiz haqida gapirib berishingiz mumkin.

4.  “Ish ta’tiliga qachon chiqsam bo‘ladi?”

Ish ta’tillari tizimi qanday tuzilganligi bilan qiziqishning hech qanday yomon tomoni yo‘q, albatta. Ammo bu savolni iloji boricha boshqa shaklda bergan yaxshiroq. Masalan, ish ta’tili tizimi qanday tuzilganligi va jarayon qanday boshqarilishi haqida so‘rashingiz mumkin. Ammo unutmagan yaxshiki, kompaniya vakili yaqin oradagi ta’tilingiz haqidagi savollarni hali ishga kirishmasdan turib, dam olish haqida orzu qilayotganingizdek tushunishi mumkin.

5.  “Bu ish menga juda kerak!”

Bu va bunga o‘xshash jumlalar adolasiz ish beruvchilar uchun ohangrabodek tuyilishi mumkin. Ular sizni ushbu ishga muhtoj deb tushunib, kam oylik evaziga ortiqcha vaqt soati bilan ishlatmoqchi bo‘lishlari mumkin. Shuningdek, bu jumla haqiqiy mutaxassislarni izlayotganlarni hushyor torttirishi ham ehtimoldan holi emas.

6.  “Istalgan ishni bajara olaman”

Istalgan ishni qila olishingizni aytgan holda, siz ish beruvchiga juda yomon ahvolda ekanligingizni bildirgan bo‘lasiz. Shu bilan birga, haq to‘lanadigan har qanday ishga tayyor ekanligingiz oldingizga qo‘yilgan barcha masalalarni hal qila olasiz degani emas.
Qiyin vaziyatda turganingizni tushuntirish o‘rniga, ish tajribangiz va avvalgi ishingizdan o‘zlashtirgan ko‘nikmalaringiz haqida gapirib bering.

7. “Hech qanday savollarim yo‘q”

Hattoki sizda hech qanday savol bo‘lmasa-da, mutaxassisligingiz yuzasizdan bir nechta savollar berishga tayyorlaning. Bu bilan siz ishga haqiqatan qiziqqaningiz va ishlash tizimini o‘rganishini xohlayotganingizni bildirasiz. Shuningdek, haddan ortiq ko‘p savollar berish ham yaramaydi. Masalan, sizga taklif qilinayotgan lavozimga yana qancha variantlar bor ekanligi yoki ofis oshxonasida kofemashina bor-yo‘qligini so‘rash noo‘rin hisoblanadi.

• Ish staji
• Job interview