Ma’lumotlarga ko‘ra, Isroil G‘azo sektorining janubidagi Rafah shahriga aviazarbalar berdi. Halok bo‘lganlar soni 100 ga yetdi. Bu haqda “Al Mayadeen” xabar berdi.

Hujum oqibatida 230 dan ortiq kishi jarohat olgan. Qurbonlar va jarohatlanganlar soni ortishi mumkin.
“G‘azo sektorining janubidagi Rafah shahrida Isroil armiyasining kuchli zarbasi natijasida kamida 100 kishi halok bo‘ldi va 230 nafardan ortiq kishi jarohat oldi”, – deydi Falastin tibbiyot manbalariga tayanib, Al Mayadeen.

Isroil armiyasi Rafahdagi Ash-Shabura kvartalidagi obyektlariga zarba berganini ma’lum qildi.

9-fevral kuni Netanyaxu Misr bilan chegaradosh G‘azo sektorining janubidagi Rafah shahrida keng ko‘lamli operatsiya boshlash niyatida ekanini ma’lum qildi. AQSh Davlat departamentining fikricha, operatsiya hozir amalga oshirilsa, falokat bo‘ladi. Rafahda quruqlikdagi operatsiya o‘tkazish Britaniya va Falastin rasmiylari tomonidan tanqid qilindi.

Rafah Isroil hujumi paytida G‘azo sektori shimolidan evakuatsiya qilingan 1,3 milliondan ortiq falastinlik uchun boshpana hisoblanadi. Ularning aksariyati chodir lagerlarida yoki BMT boshpanalarida yashaydi.

Misr Isroil qo‘shinlari G‘azo sektoridagi Rafah shahriga yuborilsa, Isroil bilan Kemp Devid kelishuvlarini (1979-yilgi Isroil-Misr tinchlik shartnomasi) to‘xtatib qo‘yish bilan tahdid qilgan. XAMAS esa Rafahga hujum qilinsa, isroillik garovga olinganlarni ozod qilish bo‘yicha muzokaralar to‘xtashidan ogohlantirgan.

• Falastin
• Isroil
• Misr
• portlash