Oq uy AQSh prezidenti Jo Bayden ko‘krak qafasidagi teri o‘simtasini olib tashlash uchun operatsiya qilinganini ma’lum qildi. Operatsiya 16-fevral kuni Vashingtondagi Uolter Rid nomidagi Milliy harbiy tibbiyot markazida bo‘lib o‘tgan.

Prezidentni davolovchi shifokor Kevin OʼKonnorning maktubida yozilishicha, biopsiya terining shikastlanishiga bazal hujayrali karsinoma sabab bo‘lganligini tasdiqladi. Ushbu turdagi teri saratoni odatda metastazni keltirib chiqarmaydi va barcha zararlangan to‘qimalar muvaffaqiyatli olib tashlandi, deyiladi bayonotda.

80 yoshli prezidentga doimiy davolanish talab qilinmaydi, deyiladi Oq uy axborotida. Bayden dermatolog nazorati ostida bo‘lishda davom etadi.

Bazal hujayrali va skuamoz hujayrali karsinomalar Qo‘shma Shtatlardagi teri saratonining eng keng tarqalgan ikkita shaklidir. Har yili 3,6 million amerikalikka bazal hujayrali karsinoma tashxisi qo‘yiladi. Agar erta davolansa, unchalik zarar keltirmaydi.

• Bayden
• Kasallik