Belarus prezidenti Aleksandr Lukashenko kecha, 9-mart kuni “Jinoiy javobgarlik to‘g‘risidagi kodekslarni o‘zgartirish to‘g‘risida”gi qonunni imzoladi. Bu haqda davlat rahbari matbuot xizmati – “BelTA” xabar berdi.
Qayd etilishicha, hujjatning asosiy maqsadi ekstremistik (terroristik) va davlatga qarshi jinoyatlarga qarshi kurashni kuchaytirishdan iborat.
Qonunda mansabdor shaxs tomonidan davlatga xiyonat qilganlik uchun jinoiy javobgarlik davlat lavozimini egallab turgan barcha shaxslarga nisbatan uzaytirilishi nazarda tutilgan. Shu bilan birga, mansabdor shaxs yoki harbiy xizmatchi tomonidan davlatga xiyonat qilganlik uchun alohida jazo chorasi – o‘lim jazosini qo‘llash imkoniyati joriy etilgan.
Davlatga qarshi yo‘nalishdagi bir qator jinoyatlar uchun qo‘shimcha jazo 50 000 asosiy birlikkacha jarima shaklida belgilanadi. Ushbu chora ana shunday qilmishlar natijasida yetkazilgan zararning so‘zsiz qoplanishini ta’minlash, aybdorlarni jinoiy faoliyatni davom ettirish vositalaridan mahrum qilish uchun mo‘ljallangan.
Terrorizmni targ‘ib qilganlik, Qurolli Kuchlar, boshqa qo‘shinlar va harbiy tuzilmalar, harbiylashtirilgan tashkilotlarni obro‘sizlantirish hamda davlat sirlarini muhofaza qilish talablarini buzganlik uchun jinoiy javobgarlik kiritiladi.
“Davlatga xiyonat qilish, davlat hokimiyatini egallashga qaratilgan til biriktirish yoki boshqa harakatlarni sodir etish, josuslik va yashirin faoliyatni sodir etishda gumon qilingan shaxslarni ushlab turish muddati uch kundan o‘n sutkagacha oshirilmoqda, bu esa tegishli ishlar bo‘yicha tezkor-qidiruv tadbirlarini yuqori sifatli o‘tkazishni ta’minlash uchun zarurdir”, – deyiladi xabarda.
Shu bilan birga, xalqaro himoyaga ega bo‘lgan muassasalarga hujum qilishga yoki qo‘poruvchilik qilishga tayyor bo‘lgan, lekin o‘z niyatidan voz kechib, ushbu jinoyatlarning oldini olishga yordam bergan shaxslarni jinoiy javobgarlikdan ozod etish nazarda tutilgan.
Shuningdek, Jinoyat-protsessual kodeksiga uni qo‘llash amaliyotidan kelib chiqqan holda muayyan tuzatishlar kiritilgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!