So‘nggi paytlarda O‘zbekistonning Misrdagi elchixonasiga fuqarolarning mahalliy huquq-tartibot organlari tomonidan ushlab turilish holati bilan bog‘liq murojaatlar soni ortdi. Bu haqda bugun, 18-dekabr kuni elchixona matbuot xizmati xabar berdi.

Xabarga ko‘ra, bu holatlar yuzasidan Misr huquqni himoya qilish idoralari bilan muzokaralar olib borilmoqda. Ushbu davlat vakolatli organlarining rasmiy ma’lumotlariga ko‘ra, Qohira va boshqa yirik shaharlarda xorijiy fuqarolar tomonidan migratsiya qonunchiligi hamda jamoat tartib-qoidalariga rioya etilish ustidan nazorat kuchaytirilgan. Xususan, Misr hududida noqonuniy ravishda bo‘lib turgan, amaldagi hujjatlarga ega bo‘lmagan, shuningdek, jamoat tartibini buzgan xorijiy fuqarolarga nisbatan ma’muriy choralar, jumladan deportatsiya tadbirlari qo‘llanilmoqda.

Shu sababli, salbiy oqibatlarning oldini olish maqsadida Misrda bo‘lib turgan O‘zbekiston fuqarolariga quyidagilar qat’iyan tavsiya etiladi:

– mahalliy qonunchilik talablariga qat’iy rioya qilish;

– shaxsni tasdiqlovchi hujjatni (pasport) doimo o‘zi bilan olib yurish;

– Misr hududida bo‘lish uchun amaldagi viza yoki vaqtinchalik/doimiy yashash ruxsatnomasi (iqoma)ga ega bo‘lish;

– tegishli ruxsatnomasiz mehnat faoliyati bilan shug‘ullanmaslik;

– viza yoki yashash ruxsatnomasi (iqoma)ning amal qilish muddatini o‘z vaqtida uzaytirish.

Mahkamada ushlab turilgan taqdirda esa pasport va boshqa shaxsiy hujjatlarni begona shaxslarga bermaslik, imkon qadar tezroq O‘zbekistonning Qohiradagi elchixonasiga murojaat qilish lozim (tel. +20233361723, +20233364516).

“Misr hududida bo‘lib turgan davr mobaynida shaxsingizni tasdiqlovchi hamda mamlakatda qonuniy bo‘lishingizni tasdiqlovchi hujjatlarni ehtiyotkorlik bilan saqlashingiz va doimo yoningizda olib yurishingiz zarur”, – deya eslatdi elchixona.

• Elchixona
• Migratsiya
• Misr
• Ogohlantirish