Umumiy narkozning salomatlikka jiddiy zarar yetkazishi haqidagi mish-mishlar bugungi kunga qadar tinmay keladi. Ayrim odamlar narkozdan jarrohlik amaliyotlaridan qoʻrqqandek qattiq qoʻrishadi. Aslida esa bu odatiy muolaja boʻlib, u hattoki stomatologiya sohasida ham keng qoʻllaniladi. Anesteziya haqidagi eng koʻp beriladigan 5 savolning javobini quyidan topasiz.

1. Umumiy narkozdan keyin salomatlikni qayta tiklash qiyin boʻladimi?

Umumiy narkoz olgandan keyin xotira, yurak-qontomir tizimi bilan bogʻliq kasalliklar paydo boʻlgani, narkoz jigar va buyraklar faoliyatiga salbiy taʼsir qilishi haqidagi gaplar tez-tez quloqqa chalinadi. Mutaxassislar esa zamonaviy anesteziya bemorlar uchun mutlaqo xavfsiz ekanligini aytishadi. Ularning taʼkidlashlaricha, narkozdan keyingi nojoʻya taʼsirlar kamdan-kam hollarda kuzatiladi va jarrohlik amaliyoti oʻtkazilganidan keyin oradan bir necha kun oʻtib butunlay yoʻq boʻlib ketadi.

2. Narkoz umrni qisqartirishi rostmi?

Tibbiyot sohasi vakillarining aytishlaricha, bu safsatadan boshqa narsa emas. Bugungi kunda anesteziyaning umr davomiyligini qisqartirishini isbotlaydigan hech fanday ilmiy dalillar yoʻq.

3. Narkoz immun tizimini “oʻldiradimi”?

Shifokorlar ushbu mish-mishni ham rad etishadi. Agar anesteziya immun tizimini “oʻldirganida”, jarrohlik amaliyotini boshdan kechirgan bemorlarning hech biri yashab qolmagan boʻlardi. Chunki odam immun tizimisiz hayot kechira olmaydi.

4. Narkozning taʼsiri jarrohlik amaliyoti vaqtida tugab qolishi mumkinmi?

Teoretik jihatdan boʻlishi mumkin, ammo amaliyotda bunday holat kuzatilmagan. Anesteziyaning bemor organizmidagi taʼsiri jarrohlik amaliyoti vaqtida tugab qolishi uchun shifokor tomonidan jiddiy va qoʻpol xatoga yoʻl qoʻyilgan boʻlishi kerak. Bunday holatlar sodir boʻlmasligi uchun zamonaviy tibbiyotda monitoring tizimi mavjud. Shuning uchun ham bemorning amaliyot vaqtida uygʻonib ketishi imkonsiz.

5. Bemor narkozdan keyin oʻziga kelmasligi ham mumkinmi?

Anesteziya qabul qilgan bemorlarning barchasi uning taʼsiri tugaganidan keyin oʻzlariga kelishadi. Jarrohlik amaliyoti vaqtida vafot etgan bemorlargina bundan mustasno. Zamonaviy tibbiyotda qoʻllaniluvchi anesteziya preparatlarining taʼsiri ularning organizmga kiritilishi toʻxtatilganidan keyin 5-10 daqiqa oʻtmay turib tugaydi. Keyingi yarim soatlik vaqt ichida bemorda yengil sarxushlik yoki uyquchanlikka oʻxshash holat saqlanib turadi va u ham bir necha soat ichida butunlay yoʻq boʻlib ketadi.

• qiziqarli
• salomatlik