Rossiya federatsiyasi bojxona xizmati va Rossiya xavfsizlik xizmati bilan hamkorlikda o‘tkazilgan tezkor tadbirda Ekvadordan katta miqdorda jo‘natilgan kokain giyohvandlik vositasi kontrabandasi fosh etildi. Bu haqda “TACC” nashri xabar berdi.

Ma’lumotlarga ko‘ra, bu 2025-yilda Lotin Amerikasidan jo‘natilgan giyohvand moddalarining eng yirik partiyasi bo‘lib, uning qiymati Rossiya qora bozorida 12 milliard rubldan oshadi.

“Chet ellik hamkasblarimizning bizga bergan ma’lumotlari o‘z tasdig‘ini topdi va Ekvadordan yuborilgan bananlarning navbatdagi partiyasida yashirin giyohvand moddalar aniqlandi. Konteynerlardan birining polini tekshirish paytida 820 dona deklaratsiyadan o‘tkazilmagan briketlar topilgan va olib qo‘yilgan. Ekspertiza xulosasida esa, briketlarning ichiga aynan kokain moddasi berkitilganligi aniqlandi” – deyiladi bojxona qo‘mitasi bergan rasmiy axborotda.

Hozirda ushbu holat bo‘yicha Rossiya federatsiyasi jinoyat kodeksining 229.1-moddasi, 4-qism “B” bandiga muvofiq jinoyat ishi qo‘zg‘atildi.

Rossiya qonunlari bo‘yicha mazkur moddalar bo‘yicha ayblanayotgan shaxslarning tegishli aybi isbotlansa, ularga nisbatan umrbod qamoq jazosi hukmi ham chiqarilishi mumkin.

• Bojxona
• Ekvador
• Giyohvandlik
• Rossiya