“Cotton Campaign” xalqaro koalitsiyasi o‘zbek paxtasini global boykot qilish chaqirig‘i tugaganini eʼlon qildi.

Bu haqda joriy yil 10-mart kuni Odam savdosiga va majburiy mehnatga qarshi kurashish milliy komissiyasi vakillari hamda “Cotton campaign” xalqaro koalitsiyasi delegatsiyasi aʼzolari ishtirokida O‘zbekiston paxtachilik sohasida yaratilgan mehnat sharoitlariga bag‘ishlangan press-brifingda maʼlum qilindi.

Oliy Majlis Senati Raisi Tanzila Narbayeva hozirda mehnat qonunchiligida xalqaro standartlarni joriy etish, majburiy mehnatga qarshi kurashishning institutsional asoslarini rivojlantirish bo‘yicha olib borilgan ishlar natijasida O‘zbekistonda tizimli majburiy mehnat va bolalar mehnatiga to‘liq barham berilganini taʼkidladi.

“Biz hukumatning majburiy mehnatga barham berish va O‘zbekiston paxta sektorini isloh qilish uchun zarur bo‘lgan islohotlarni taklif qilishda va amalga oshirishdagi yetakchiligini yuqori baholaymiz. So‘nggi yillarda O‘zbekiston tomonidan erishilgan natijalar “Cotton Campaign” xalqaro koalitsiyasi tomonidan o‘zbek paxtasiga nisbatan eʼlon qilingan boykotni olib tashlash uchun asos bo‘ldi”, – deydi “Cotton Campaign” taʼsischilaridan biri Bennet Friman. .

Taʼkidlanishicha, O‘zbek paxtasidan boykotning olib tashlanishi birinchi navbatda tekstil sanoatida dunyodagi yetakchi korxonalarning O‘zbekiston bozoriga kirib kelishiga imkon yaratadi.

Shuningdek, ushbu eʼtirof mamlakatda millionlab odamlarga yangi ish o‘rinlarini yaratishga, qishloq xo‘jaligi sohasida xalqaro standartlarni joriy etishga, to‘qimachilik mahsulotlarining eksport hajmini oshirishga hamda sohada xalqaro hamkorlikni yana-da rivojlantirishga xizmat qilishi qayd etildi. 

• O‘zbekiston
• Paxta
• boykot