“Davlat fondiga kirmaydigan daraxtlar va butalar qimmatbaho navlarining kesilishiga moratoriy o‘rnatilganiga qaramay, ming afsuski hamon qurilish jarayonlarida daraxtlarni kesish holatlari to‘xtamayapti.

Ijtimoiy tarmoqlarda Toshkent shahri, Mirobod tumani, Yangi Mirobod mahallasi, Avliyo ota ko‘chasi 124-uy manzilida yashillik va daraxtzorlar yo‘qolib, o‘rniga tuproq yer yuzaga kelganligi hamda ushbu manzilda qurilish ishlari  amalga oshirilayotganligi yuzasidan ma’lumotlar tarqalmoqda.

Xabarlarga ilova qilingan fotosuratlarda ushbu yer uchastkasining oldingi va hozirgi holati aks etgan bo‘lib, unda hududdagi yashillik keskin kamayib ketganligini ko‘rish mumkin.

Ushbu holat bir qator savollarni yuzaga keltirmoqda.

mazkur hududdagi daraxtlar xatlovdan o‘tkazilganmi, daraxtlarni yo‘q bo‘lganlik holati nima bilan izohlanadi;

o‘zi bu yer uchastkasi tadbirkorlik subyektiga ajratilishida yer qonunchiligi talablariga rioya etilganmi;

qurilishning amalga oshirilishi Toshkent shahrining 2045-yilgacha bo‘lgan davrga mo‘ljallangan bosh rejasiga muvofiqmi; ushbu manzilida qurilayotgan obyekt ekologik talablarga muvofiqligi yuzasidan ekologik ekspertizadan o‘tkazilganmi;

qurilish jarayonida daraxtlar kesilishining oldini olish va saqlab qolish bo‘yicha qanday chora-tadbirlar amalga oshirilgan?

Xuddi shu savollar bilan Oliy Majlis Qonunchilik palatasi deputati, O‘zbekiston Ekologik partiyasi fraksiyasi a’zosi Navro‘zbek Yusufov tomonidan O‘zbekiston Respublikasi Bosh prokurori hamda Ekologiya, atrof-muhitni muhofaza qilish va iqlim o‘zgarishi vaziriga

deputatlik so‘rovi yuborildi” – deb ta’kidlangan partiya bergan rasmiy xabarida.

• Bosh prokuratura
• Deputat
• Ekologiya
• Ekopartiya