O‘zbekiston Respublikasi Prezidentining Saudiya Arabistoniga davlat tashrifi yakunlandi.

Davlat rahbari 17-avgust kuni Valiahd shahzoda Muhammad bin Salmon Ol Saud bilan muzokara o‘tkazdi. Uning natijalari bo‘yicha O‘zbekiston Respublikasi bilan Saudiya Arabistoni Podshohligi o‘rtasida keng qamrovli sheriklik munosabatlarini yanada kengaytirish to‘g‘risida Qo‘shma bayonot, shuningdek, energetika, bojxona, fuqaro aviasiyasi, turizm, qishloq xo‘jaligi, sog‘liqni saqlash, mehnat munosabatlari sohalarida 15 ta hujjat qabul qilindi.

18-avgust kuni Islom hamkorlik tashkiloti hamda Islom taraqqiyot banki rahbarlari, saudiyalik ishbilarmonlar bilan uchrashuvlar o‘tkazildi.

Makka va Madina shaharlari ziyorati ham tashrifning alohida e’tiborli voqeasi bo‘ldi.

Prezident Shavkat Mirziyoyev Saudiya Arabistoniga tashrifi chog‘ida muqaddas Makka shahrida ham bo‘lib, umra amallarini bajardi.

Davlat rahbari dinimiz arkonlariga muvofiq ehromga kirib, namoz o‘qidi, talbiya aytib, Masjidul Haramga bordi.

Ma’lumki, Ka’batullohning ichiga kirish musulmonlar orzu qiladigan ulug‘ sharafdir. Prezidentimiz ana shunday sharafga muyassar bo‘lib, Ka’batullohning ichida namoz o‘qidi.

So‘ng, Baytulloh atrofida yetti bor tavof, Safo va Marva tepaliklari orasida yettita sa’y qilindi.

Mamlakatimiz delegasiyasi a’zolari, ulamo va ziyolilar bilan birgalikda yurtimizga tinchlik va taraqqiyot, xalqimizga salomatlik va farovonlik tilab duolar o‘qildi.

Prezident Shavkat Mirziyoyev 19 avgustga o‘tar kechasi Jiddadan Toshkentga jo‘nab ketdi.

• Makka
• O‘zbekiston
• Saudiya Arabistoni