Xorazm viloyatining Gurlan tumaniga yangi hokim tayinlandi.

Bugun, 8-avgust kuni xalq deputatlari Gurlan tumani Kengashining navbatdan tashqari sessiyasida Ruslan Hojibayevich O‘razboyev tuman hokimi lavozimiga tasdiqlandi. Bu haqda Xorazm viloyati hokimligi matbuot xizmati xabar berdi.

1979-yilda tug‘ilgan Ruslan O‘razboyev 2000-yilda Toshkent irrigatsiya va qishloq xo‘jaligini mexanizatsiyalash muhandislari institutini tamomlagan.

U tayinlovga qadar O‘zbekiston Respublikasi Iqtisodiyot va moliya vazirligi huzuridagi Kadastr agentligining Xorazm viloyati boshqarmasiga rahbarlik qilgan.

Ma’lumot uchun, 7-avgust kuni Furqat, Toshkent, Mingbuloq, Qorao‘zak, Taxiatosh va Yangiariq tumanlari hamda G‘ozg‘on shahriga ham yangi hokimlar tayinlangan edi.

Mazkur hududlarning avvalgi hokimlarini lavozimidan ozod etish bo‘yicha Bosh vazir Abdulla Aripovning taklifi 17-iyul kuni Prezident Shavkat Mirziyoyev raisligida o‘tkazilgan videoselektor yig‘ilishida qo‘llab-quvvatlangan.