22°
Kechasi 12°
Sputnik / Aleksandr Yuriyev
Tatariston hukumati O‘zbekiston bilan Tu-214 samolyotlarini ishlab chiqarishni qayta tiklash bo‘yicha hamkorlikni taklif qilmoqda.
Bu haqda Sputnik nashri Tatariston prezidentining aviatsiya kompleksi va mashinasozlik bo‘yicha yordamchisi Ravil Zaripovga tayanib maʼlum qildi.
“Bugun Tu-214 samolyotlarini ishlab chiqarishni qayta tiklash to‘g‘risida qaror qabul qilindi. Loyiha, albatta, oson emas. Bu borada O‘zbekiston tomonidan ham hamkorlikka umid qilamiz”, - deydi Zaripov.
Uning aniqlik kiritishicha, gap samolyotning ayrim ehtiyot qismlarini birgalikda ishlab chiqarish haqida ketyapti.
O‘z navbatida O‘zbekiston investitsiyalar va tashqi savdo vaziri o‘rinbosari Xurram Teshaboyevga ko‘ra, Birlashgan aviatsiya korporatsiyasi (BAK) bilan Toshkent mexanika zavodi allaqachon ishlab chiqarish uchun butlovchi qismlar bazasi ro‘yxatini kengaytirish bo‘yicha kelishuvlarga erishgan.
“Bu, birinchi navbatda, Il-76 va Il-114 samolyotlari uchun butlovchi qismlar ishlab chiqarishga taʼsir qiladi”, – deyiladi xabarda.
Teshaboyevning qo‘shimcha qilishicha, BAK bilan Rossiya aviatsiya sanoati ehtiyojlarini qondiradigan O‘zbekiston mashinasozlik korxonalari konsorsiumini yaratish bo‘yicha ham kelishuvga erishilgan.
Avvalroq, RF Bosh vaziri o‘rinbosari Yuriy Borisov S.P. Gorbunov nomidagi Qozon aviatsiya zavodida yiliga kamida 10 ta Tu-214 yo‘lovchi samolyotlarini ishlab chiqarilayotgani haqida maʼlum qilgan.
Maʼlumot uchun, 2021-yilning aprelida O‘zbekiston va Rossiya samolyotsozlik sohasida qo‘shma loyihalarni amalga oshirish imkoniyatini muhokama qilgan. Unda gap birinchi navbatda Chkalov nomidagi Toshkent aviatsiya ishlab chiqarish birlashmasi haqida ketgan. Mazkur zavodda sovet davrida “Il-76” samolyotlari, 2012-yilga qadar esa “Il-114-100” samolyotlari ishlab chiqarilgan.
Chkalov nomidagi Toshkent aviatsiya ishlab chiqarish birlashmasi 1941-yilda paydo bo‘lgan – urush boshlanishi bilan 1932-yilda Moskva yaqinidagi Ximki shahrida tashkil etilgan zavod Toshkentga evakuatsiya qilingan.
Ayni paytda uning asosiy hududida Toshkent mexanika zavodi joylashgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
