Namangan viloyatining Pop tumanida yer maydonini rasmiylashtirib berishni va’da qilgan shaxslar qo‘lga olindi. Bu haqda Bosh prokuratura huzuridagi Departament xabar qildi. Ma’lum qilinishicha, Departamentning Pop tumani bo‘limi hamda boshqa huquqni muhofaza qiluvchi organlar xodimlari hamkorligida o‘tkazilgan tezkor tadbir davomida fuqarolar U.A. va M.B. (muqaddam sudlangan) o‘zaro til biriktirgan holda qo‘lga olingan.

Tergovga qadar tekshiruv materiallariga ko‘ra, ular Kadastrlar palatasida ishlovchi tanishlari orqali «Qo‘shminor» mahalla fuqarolar yig‘ini hududida joylashgan fermer xo‘jaligi balansidagi 50 sotix yer maydonini 381 ming AQSH dollari evaziga fuqaro A.S. nomiga noturar joy sifatida rasmiylashtirib berishni va’da qilgan.

Tezkor tadbir jarayonida gumonlanuvchilar ushbu xizmat evaziga 5 ming AQSH dollarini olgan vaqtda ushlangan. Tadbirning davomida Kadastrlar palatasi Pop tumani bo‘limining sobiq boshlig‘i S.A. ham 1,5 ming AQSH dollari va 6 million so‘mni olgan vaqtida ashyoviy dalillar bilan qo‘lga olingan. Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan bo‘lib, ayni paytda tergov harakatlari olib borilmoqda.