Jahon neft bozorida narxlar pasayishda davom etmoqda. Yaqin Sharqdan neft yetkazib berish hajmi oshishi kutilayotgani hamda bozorda taklifning yetarli ekani narxlarga jiddiy bosim o‘tkazmoqda.

So‘nggi ma’lumotlarga ko‘ra, avgust oyida yetkazib beriladigan Brent neftining bir barreli 72,68 dollarga, WTI markali neft esa 69,58 dollarga tushdi. Bu esa so‘nggi bir necha oy ichidagi eng past ko‘rsatkichlardan biri bo‘ldi.

Tahlilchilarga ko‘ra, AQSH sanksiyalarining vaqtincha yumshatilishi ortidan Eron neft eksportini oshirishi kutilayotgani ham bozorga ta’sir ko‘rsatmoqda.

AQSH Energetika vaziri Kris Raytning ma’lum qilishicha, Ho‘rmuz bo‘g‘ozi orqali neft tashish hajmi urush boshlanishidan oldingi darajaga deyarli qaytgan. So‘nggi 24 soat ichida bo‘g‘oz orqali kamida 20 million barrel neft tashilgani qayd etildi.

Shu bilan birga, mintaqadagi vaziyat to‘liq barqarorlashgani yo‘q. Eron va AQSH o‘rtasidagi qarama-qarshiliklar saqlanib qolayotgan bir paytda, Ho‘rmuz bo‘g‘ozidagi xavfsizlik masalalari hamon dolzarbligicha qolmoqda.