Oʻzbekistonda 9 yoshdagi qizlarni papilloma virusiga qarshi emlash boshlandi. Bu haqda Sanitariya-epidemiologiya qoʻmitasi
xabar berdi.
Qayd etilishicha, milliy emlash kalendari asosida “Odam papilloma virusi (VPCH)”ga qarshi emlash oʻtkazilmoqda.
Aprel va may oylarida joylardagi davolash-profilaktika muassasalarining emlash brigadalari tomonidan 9 yoshdagi qizlarni emlash tadbirlari olib boriladi.
“Buning uchun 3138 ta emlash punktida tibbiyot xodimlarining tayyorgarligi oshirilib, rejaga asosan 307 064 nafar 9 yoshdagi qizni emlash qamrovi jarayoni davom etayapti”, deyiladi xabarda.
Taʼkidlanishicha, agar VPCH vaksinasi bilan emlash oʻtkazilsa kelgusida 1100 nafar ayolni bachadon boʻyni saratoni bilan kasallanishining oldi olinadi va 583 nafar ayolning hayotini saqlab qolishga erishiladi.
Davlat statistika qoʻmitasi maʼlumotlariga koʻra, bachadon boʻyni saratoni Oʻzbekistonda barcha yoshdagi ayollar oʻrtasida koʻkrak bezi saratonidan keyingi oʻrinda turadigan va eng koʻp tarqalgan saraton kasalligi hisoblanadi.
Jahon sogʻliqni saqlash tashkilotiga koʻra, har yili dunyo boʻyicha 528 000 nafar ayol bachadon boʻyi saratoni kasalligi bilan kasallanib, ulardan 266 000 nafari nobud boʻlmoqda.
Oʻzbekistonda esa har yili 1660 nafar ayol bachadon boʻyni saratoni kasalligiga chalinayotgan boʻlsa, 608 nafar ayol vafot etmoqda.
38°
Kechasi 21°
