Insoniyat yaratayotgan kashfiyotlar tabiat muvozanatiga jiddiy ta'sir ko'rsatmoqda. Shu sababli, hali bahor tugamay havo harorati 40 darajaga yaqinlashib qoldi.

Xo‘sh, issiq havoda qanday kasalliklar bosh koʻtaradi? Jaziramadan sizni qanday liboslar himoya qilishi mumkin? Nima uchun issiq kunlarda zararli odatlardan voz kechish kerak? Bu maqola orqali siz ushbu savollarga javob topishingiz mumkin.

Jazirama nimasi bilan xavfli?

Havoning yuqori harorati – nafaqat turli kasalliklardan aziyat chekuvchi insonlar, balki sogʻlom odamlar uchun ham ogʻir sinov.

Issiqlik organizmga katta bosim tushiradi. Bunday holatda organizmning himoya tizimlaridan biri boʻlmish ter ajralishi faollashadi. Ammo, bunda ter bilan birga organizmdan muhim mikroelementlar, foydali moddalar ham chiqib ketadi. Koʻp suyuqlik yoʻqotish oqibatida qon quyuqlashadi, bu esa yurak-qontomir kasalliklarining bosh koʻtarishiga olib keladi.

Jaziramada qanday kasalliklar kuchayadi?

Havo juda issiq boʻlgani tufayli organizmdagi surunkali kasalliklar, yurak-qontomir, bronxologik, endokrin kasalliklari kuchayib ketadi. Bu gipertoniklar uchun ham, gipotoniklar uchun ham xavfli davr.

Issiq havoda terlab turib, yaxna ichimliklar isteʼmol qilish angina, pnevmoniya, piyelonefrit kasalliklarini keltirib chiqaradi.

Jaziramada nimalardan saqlanish kerak?

Jaziramada tana haroratini koʻtarib yuboradigan har qanday harakatni cheklash kerak. Quyosh toʻgʻridan toʻgʻri tushib turadigan joylarda koʻp qolib ketmang, ogʻir jismoniy mashqlar bilan shugʻullanmay turing. Issiq kunda spirtli ichimlik isteʼmol qilish organizmga salbiy taʼsir koʻrsatadi.

Jaziramada qanday kiyinish kerak?

Bu boradagi qoidalar juda oddiy: liboslarning yorqin rangdagi, tabiiy matolardan tayyorlanganini tanlang. Bunday vaqtda sintetik liboslar kiyish qon aylanish jarayonining buzilishiga olib keladi. Quyosh urishidan saqlanish uchun koʻchaga chiqishdan avval bosh kiyim kiyishni unutmang.

• Jazirama
• Ob-havo