O‘zbekistonda islom obligatsiyalari — sukuk muomalaga kiritiladi

Oliy Majlis Qonunchilik palatasi “Kapital bozori to‘g‘risida”gi qonun loyihasini birinchi o‘qishda qabul qildi. Hujjatga ko‘ra, O‘zbekistonda sukuk (islom obligatsiyalari) va boshqa zamonaviy moliyaviy vositalarni muomalaga kiritish rejalashtirilmoqda.

Qonun loyihasining asosiy maqsadi kapital bozorini xalqaro standartlar asosida rivojlantirish, investorlar uchun yangi investitsiya imkoniyatlarini yaratish hamda mamlakatning investitsiyaviy jozibadorligini oshirishdan iborat.

Loyihaga muvofiq, kapital bozorida quyidagi moliyaviy vositalar joriy etiladi:

sukuk (islom obligatsiyalari);

barqaror rivojlanish obligatsiyalari;

qoplangan obligatsiyalar;

sekyuritizatsiyalangan obligatsiyalar.

Deputatlar muhokamalar davomida investorlar huquqlarini himoya qilish, korporativ boshqaruv sifatini oshirish, emitentlarning axborotlarni ochiq e’lon qilish majburiyatlarini kuchaytirish hamda kapital bozorini IOSCO xalqaro tamoyillari asosida takomillashtirish zarurligini ta’kidladi.

Mutaxassislar fikricha, sukukning joriy etilishi islom moliyasi tamoyillariga amal qiluvchi investorlar uchun yangi imkoniyatlar yaratib, mahalliy va xorijiy investitsiyalarni jalb etishga xizmat qiladi.