Rossiya Fan va oliy ta’lim vazirligining rasmiy saytida e’lon qilingan “Rossiya va O‘zbekiston o‘rtasidagi hamkorlik: Rossiya universitetlarining yangi filiallari, Suffa xalqaro radioastronomiya observatoriyasi, qo‘shma ilmiy loyihalar” nomli maqolada keltirilishicha, yaqin yillarda O‘zbekistonda Rossiyaning 7 ta universiteti o‘z filiallarini ochishni rejalashtirgan.

“Bugungi kunda Rossiya va O‘zbekiston hamkorlikda ko‘plab loyihalarni amalga oshirmoqda. Eng yiriklaridan biri – keng ko‘lamli astrofizik tadqiqotlarni o‘tkazish uchun mo‘ljallangan Suffa xalqaro radiokosmik observatoriyasini qurilishi doirasida amalga oshirilyapti. Bundan tashqari, o‘zbekistonlik 48,7 ming talaba Rossiya OTMlarida ta’lim olmoqda. Yaqin yillarda Rossiyaning yana 7 ta universiteti O‘zbekistonda o‘z filiallarini ochishni rejalashtirgan”, – deyiladi maqolada.

Qayd etilishicha, Rossiyaning quyidagi 7 ta universiteti – N.I.Pirogov nomidagi Rossiya milliy tadqiqot tibbiyoti universiteti, A.N.Kosigin nomidagi Rossiya davlat universiteti (Texnologiya. Dizayn. San’at), Shimoliy Kavkaz federal universiteti, Samarqandda Rossiya davlat gumanitar universiteti, Moskva davlat geodeziya va kartografiya universiteti, Perm milliy tadqiqot politexnika universiteti, Moskva davlat oziq-ovqat ishlab chiqarish universitetlari O‘zbekistonda o‘z filialini ochishni rejalashtirgan.

Ma’lumot uchun, bir muddat oldin Rossiya universitetlarining diplomlari dunyo tomonidan tan olinmasligi haqida xabarlar tarqaldi. Unga ko‘ra, Jahon assotsiatsiyalari Rossiya universitetlari tomonidan berilgan ta’lim diplomlarini tan olishdan bosh tortmoqda.

Hozircha, AACSB (Universitetlar biznes maktablarini rivojlantirish assotsiatsiyasi), Business Graduates Association (Biznes maktablar bitiruvchilari assotsiatsiyasi), AMBA (MBA dasturlari assotsiatsiyasi), EFMD (Menejmentni rivojlantirish bilan shug‘ullanuvchi biznes maktablar, kompaniya va assotsiatsiyalar global tarmog‘i) Rossiya Federatsiyasining barcha muassasalarida akkreditatsiyani o‘chirishga qaror qilgan.

“Biznes ta’limi bo‘yicha jahon yetakchilari sifatida bizning tashkilotlarimiz tinchlik, xavfsizlik, erkinlik, xilma-xillik va ijtimoiy mas’uliyat qadriyatlariga sodiqligimiz tufayli 150 dan ortiq mamlakat va hududlardagi o‘qituvchilar va rahbarlarni qo‘llab-quvvatlaydi va ularga xizmat qiladi.

Biz Rossiyaning Ukrainaga bostirib kirishi natijasida tez sur’atlar bilan o‘sib borayotgan gumanitar inqirozdan qattiq xavotirdamiz va biz Ukrainadagi biznes maktablarimiz va ularning xodimlari, professor-o‘qituvchilari va talabalarini hayot tarzi va suverenitetini himoya qilishga hamda qo‘llab-quvvatlashga qaror qildik”, – deyiladi Universitetlar biznes maktablarini rivojlantirish assotsiatsiyasi rasmiy saytida.

• Diplom
• OTM
• O‘zbekiston
• Rossiya