Niderlandiyaning Veyk-an-Zeye shahri mezbonlik qilgan shaxmat bo‘yicha an’anaviy Tata Steel Chess nufuzli musobaqasi o‘zbekistonlik shaxmatchilarning muvaffaqiyati bilan yakunlandi.

Turnirning kuchlilar jam bo‘lgan “Masters” guruhida dunyoning yetakchi 14 grossmeysteri qatorida o‘zbekistonlik Nodirbek Abdusattorov va Javohir Sindarov ham bosh sovrin uchun bahs olib bordi. 

Nodirbek Abdusattorov 13 imkoniyatdan 9 ochko jamg‘arib, to‘rtinchi urinishda Tata Steel Chess 2026 chempionligini qo‘lga kiritdi. Javohir Sindarov 8,5 ochko bilan sof ikkinchi o‘rinni egalladi. Mezbonlar vakili Yorden van Forest 7,5 ochko to‘plagan holda, qo‘shimcha ko‘rsatkichlarga ko‘ra sovrinli uchinchi o‘rinni band etdi. Amerikalik Hans Niyemann va germaniyalik Vinsent Keymer 7,5 ochko bilan Top-5’ga yakun yasab berishdi. 

Musobaqaning o‘tgan yilgi chempioni hindistonlik Rameshbabu Praggnanandha esa 5,5 ochko bilan 11-pog‘onadan joy oldi. Amaldagi jahon chempioni Gukesh Dommaraju (Hindiston) 13 imkoniyatdan 6,5 ochko to‘pladi va 10-o‘rin bilan kifoyalandi.

• Gollandiya
• Nodirbek Abdusattorov
• Shaxmat