AQShning Noble Capital RSD investitsiya fondi Moskvadan Rossiya imperiyasining qarz majburiyatlari bo‘yicha 225 milliard dollar to‘lashni talab qildi. Shu bilan bog‘liq da’vo Rossiya Federatsiyasiga, Rossiya Moliya vazirligiga, Markaziy bankka va Milliy farovonlik jamg‘armasiga nisbatan Kolumbiya okrugi federal sudiga topshirilgan.

Da’vo arizasida keltirilishicha, “Rossiya Federatsiyasi hokimiyat merosxo‘rlik doktrinasini buzib, o‘zining oldingi davr vakili – Rossiya imperiyasining oldindan olgan davlat qarz majburiyatlarini bajarishdan bosh tortdi va hozir ham bosh tortishda davom etmoqda”.

Noble Capital RSD o‘zini 1916-yilda chiqarilgan va Nyu Yorkdagi National City Bank (hozirgi Citibank) orqali tarqatilgan 25 million dollarlik 5,5 foizli Rossiya imperiyasi obligatsiyalarining qonuniy egasi deb hisoblaydi. Da’vogarning fikricha, Rossiya Sovet Ittifoqi merosxo‘ri sifatida ushbu qarzlarni meros qilib olgan va foizlar bilan birga ular kamida 225,8 milliard dollarni tashkil etadi. Ushbu summa Rossiya yillik byudjetining 43 foiziga teng (40,2 trillion rubl) va “Sberbank“, “Gazprom” va “Rosneft” kompaniyalarining bozor qiymatidan oshadi. Fond qarzni 2022-yilda muzlatilgan Rossiya aktivlari hisobidan to‘lashni taklif qilmoqda. Shu bilan birga, AQShda Rossiya Markaziy bankining taxminan 5 milliard dollari bloklangan, qolgan mablag‘lar esa Yevropa mamlakatlarida saqlanmoqda.

Rossiya Moliya vazirligi AQShdagi da’vo masalasi “Bosh prokuratura vakolatida” ekanini bildirgan. Davlat Dumasining fuqarolik jamiyati rivoji qo‘mitasi raisining o‘rinbosari Sergey Obuxovning aytishicha, imperiya qarzlari “muddati o‘tganligi sababli, shuningdek, Rossiya imperiyaning merosxo‘ri emasligi sababli tan olinmasligi lozim”.

Yuristlarga ko‘ra, ilgari qarzni tan olish ham sud qarorini ijro etishga imkon bermagan, lekin sanksiyalar siyosati ta’minot choralarini qo‘llash va aktivlarni boshqarish imkoniyatini yaratgan. Shu bilan birga, da’voda aytilishicha, bu xususiylashtirish yoki musodara haqida emas, balki qarzni hisobga olish orqali majburiyatni bajarish shakli haqida.

• AQSh
• Rossiya
• Sud