26-iyun kuni Ekvador terma jamoasi Germaniya ustidan 2:1 hisobida g‘alaba qozondi. Ushbu natija O‘zbekistonning Jahon chempionati pley-off bosqichiga chiqish imkoniyatlariga jiddiy ta’sir ko‘rsatdi.

Mazkur g‘alaba orqali Ekvador “E” guruhida 4 ochko bilan uchinchi o‘rinni egalladi va uchinchi o‘rin sohiblari o‘rtasidagi umumiy reytingda birinchi pog‘onaga ko‘tarildi. Natijada pley-off yo‘llanmasi uchun kurash yanada keskinlashdi.

Musobaqa nizomiga ko‘ra, guruhlarda uchinchi o‘rinni egallagan 12 ta jamoadan eng yaxshi 8 tasi pley-off bosqichiga yo‘l oladi. Ayni paytda ushbu reytingning sakkizinchi o‘rnidagi jamoa ham 3 ochkoga ega.

Bu esa O‘zbekiston terma jamoasi uchun vaziyatni ancha murakkablashtiradi. Endilikda terma jamoa guruh bosqichining so‘nggi turida Kongo Demokratik Respublikasiga qarshi maydonga tushadi. Hozirgi holatga ko‘ra, O‘zbekiston pley-offga chiqish imkoniyatini saqlab qolishi uchun raqibini kamida to‘rt to‘p farqi bilan mag‘lub etishi talab etiladi.

Hal qiluvchi uchrashuv 28-iyun kuni Atlantada Toshkent vaqti bilan soat 04:30 da bo‘lib o‘tadi.