Hukumatning tegishli qaroriga ko‘ra, umumiy o‘rta ta’lim muassasalarida faoliyat yuritayotgan va xalqaro akkreditatsiyalangan tizimda oliy malaka toifasiga ega o‘qituvchilar endilikda pedagogika yo‘nalishi bo‘yicha magistraturada masofaviy ta’lim shaklida maqsadli asosda tahsil olishi mumkin bo‘ladi.

Mazkur tartib asosida qabul amaldagi magistratura qabul qoidalari asosida amalga oshiriladi. O‘qituvchilar ishdan ajralmagan holda masofaviy shaklda o‘qiydi hamda magistraturani tamomlagach, kamida uch yil umumiy o‘rta ta’lim muassasalarida faoliyat yuritishi shart bo‘ladi.

Qarorga ko‘ra, maqsadli magistraturaga qabul qilingan oliy toifali o‘qituvchilarga to‘lov-kontrakt summasini davlat byudjeti hisobidan qoplash bo‘yicha amaldagi imtiyozlar tatbiq etilmaydi.

2026/2027-o‘quv yilidan boshlab ushbu tizim Nizomiy nomidagi O‘zbekiston milliy pedagogika universitetida yo‘lga qo‘yiladi.

Shuningdek, yangi o‘quv yilidan davlat va nodavlat maktabgacha ta’lim tashkilotlarida faoliyat yuritayotgan o‘rta maxsus ma’lumotli pedagoglar uchun bakalavriat bosqichida dual ta’lim shakli ham joriy etiladi.