Toshkentning “Paxtakor” klubi ikki nafar futbolchini oʻz safiga qoʻshib olganini eʼlon qildi.

Oʻng qanot himoya va yarim himoyasida oʻynaydigan Dilshod Saitov faoliyatini “Sherlar” safida davom ettiradigan boʻldi.

Tez orada 24 yoshga toʻladigan himoyachi hozirga qadar “Nasaf” sharafini himoya qilgan. Superligada 106 oʻyinda 11 gol muallifi boʻlgan.

Chempionlar Ligasida esa 14 bahsda maydonga tushgan. Futbolchi va klub oʻrtasida uch yillik shartnomaga imzo chekildi. U erkin agent sifatida Toshkent klubiga koʻchib oʻtdi.

Shuningdek, faoliyati davomida Gruziyaning “Dinamo Tbilisi” va “Dila”, Kiprning “Nea Salamis” va Oʻzbekistonda AGMK klublarida oʻynagan Giorgi Papava ham “Paxtakor” aʼzosiga aylandi.

Futbolchi yuqori ligalarda 242 oʻyinda maydonga tushib, 7 gol muallifiga aylangan. Yevrokuboklarda 19 uchrashuvda 1 toʻp kiritgan.

“Dinamo” Tbilisi bilan jamoa sardori sifatida 4 karra Gruziya chempioni boʻlgan.

• Futbol
• Paxtakor
• Transferlar