Hindistonning Goa shahrida o‘tayotgan FIDE Jahon kubogi 2025-musobaqasida o‘zbek shaxmatchilari yana bir tarixiy natija qayd etdi. Yarim finalda o‘zbekistonlik ikki shaxmatchi Javohir Sindarov va Nodirbek Yoqubboyev o‘zaro to‘qnash kelib, Sindarov 2,5:1,5 hisobida ustunlikka erishdi.

Bu g‘alaba orqali u jahon shaxmat tojiga da’vogarlar 2026-yilgi turniriga yo‘llanma qo‘lga kiritdi. O‘zbekiston shaxmat tarixida ilk bor bunday nufuzli musobaqaga to‘g‘ridan-to‘g‘ri chiqish imkoni Sindarov tomonidan qayd etildi. Finalda u xitoylik grossmeyster Vey Iga qarshi bahs olib boradi.

Yarim finalda mag‘lub bo‘lgan Nodirbek Yoqubboyev uchun ham imkoniyat saqlanib qolgan. U uchinchi o‘rin uchun neytral bayroq ostida ishtirok etayotgan Andrey Yesipenko bilan bellashadi. Bu bahs g‘olibi ham 2026-yilgi da’vogarlar turnirida ishtirok etish huquqini qo‘lga kiritadi.

Da’vogarlar turniri 2026-yil 28-martdan 16-aprelgacha Kiprda o‘tkaziladi. Unda jami 8 nafar shaxmatchi ishtirok etadi. Hozircha musobaqaga yo‘llanma olganlar quyidagilar: Fabiano Karuana (AQSh), Anish Giri (Niderlandiya), Mattias Blyubaum (Germaniya), Xikaru Nakamura (AQSh), Javohir Sindarov (O‘zbekiston) va Van I (Xitoy).

Jahon kubogi g‘olibi keyinchalik amaldagi jahon chempioni — hindistonlik Gukesh Dommarajuga qarshi toj uchun kurash olib boradi.

• Jahon kubogi
• Shaxmat