Estoniya Mudofaa investitsiyalari markazi vakili Krismar Rozinning ma’lum qilishicha, joriy hafta holatiga ko‘ra yettita bunker o‘rnatishga tayyor holga keltirilgan. Yil oxirigacha rasmiylar jami 28 ta bunkerni joylashtirishni rejalashtirmoqda.

“Shuningdek, tikanli maxsus simlar va “ajdaho tishlari” turidagi to‘siqlar zaxirasi shakllantirilgan bo‘lib, zarurat tug‘ilganda o‘rnatish uchun oldindan tayyorlangan maydonlarda saqlanmoqda”, — degan Rozin.

Ushbu inshootlar Yevropa Ittifoqi va NATOning sharqiy qanotini mustahkamlash maqsadida yaratilayotgan 600 ta boshpanadan iborat bunkerlar tarmog‘ining birinchi liniyasini tashkil etadi.

“Maydoni taxminan 35 kvadrat metr bo‘lgan boshpanalar 152 millimetrlik artilleriya snaryadlari zarbasiga bardosh bera olishi lozim. Ular Rossiyaning ehtimoliy bosqinini oldini olishga qaratilgan ko‘p bosqichli mudofaa tizimining bir qismi hisoblanadi”, – deya yozmoqda Defence News nashri.

• Chegara
• Estoniya
• Rossiya