Portugaliya milliy terma jamoasining sobiq bosh murabbiyi Paulo Bentu O‘zbekiston termasining boshqaruviga kelishi mumkin.

“Football Asian” nashrining xabariga ko‘ra, hozirda murabbiy bilan muzokaralar jarayoni ketmoqda. Yaqin kunlarda Bentuning hal qiluvchi qarorini bilish maqsadida yakuniy muzokaralar bosqichi o‘tkazilishi kutilmoqda.

Shuningdek, tasdiqlanmagan ma’lumotlarga ko‘ra, mutaxassis yaqin kunlarda boshlanadigan “CAFA Nations Cup-2025” musobaqasi paytida termamizning o‘yinlarini kuzatgani tashrif buyurishi ham mumkin. Ammo aytib o‘tganimizdek, bu hozircha tasdiqlanmagan ma’lumot sanaladi.

Avvalroq, O‘FA Yoahim Lyov va Fotih Terim kabi murabbiylarga ham taklif bilan chiqqan, lekin ijobiy javob olmagan edi.

57 yoshli Paulo Bentu faoliyati davomida 2010-2014-yillar orasida Portugaliya milliy terma jamoasini boshqargan va “Yevro-2012” bahslarida yarim finalga qadar yetib borgan.

Keyinchalik Osiyo qit’asida Janubiy Koreya terma jamoasi bilan “JCH-2022” musobaqasida muvaffaqiyatli ishtirok etgan. Uning oxirgi ish joyi BAA terma jamoasi hisoblanadi. Bentu u yerdan may oyidan iste’foga chiqqanidan beri hozircha ishsiz yuribdi.

Shuningdek, murabbiy Braziliyaning “Kruzeyro”, Gretsiyaning “Olimpiakos”, Xitoyning “Chonkong Lifan” klublarida ham faoliyat olib borgan.

• Futbol
• Portugaliya
• Sport
• Terma jamoa