“Manchester Siti” bosh murabbiyi Pep Gvardiola Angliya Premyer Ligasining 16-turi doirasidagi “Fulhem”ga qarshi bahs oldidan o‘zbekistonlik himoyachi Abduqodir Husanovning holati haqidagi savollarga javob berdi.

“Husanovning holati yaxshi, u o‘ynashga tayyor. Uning ingliz tilini bilish darajasi haqida gapiradigan bo‘lsam, tan olaman, Abduqodir Uilyam Shekspirdek gapira olmaydi. Ammo bizning nimani xohlayotganimizni yaxshi tushunadi, aytgan gaplarimizni tezda anglaydi va kundan-kunga yanada rivojlanib bormoqda. U juda aqlli futbolchi. Jismonan kuchli, tezkor va doim kerakli pozitsiyalarda paydo bo‘ladi”, – deydi ispaniyalik mutaxassis.

Avvalroq Husanov “Liverpul”ga qarshi bahsning 60-daqiqasida “shaharliklar” darvozaboni Janluiji Donnarumma bilan to‘qnashib ketgandi. Gvardiola tavakkal qilishni istamadi va klub shifokori tavsiyasi bilan uni Ruben Diashga almashtirdi. Keyinroq “Manchester Siti” shifokorlari o‘zbekistonlik himoyachining holati yaxshi ekanligi va navbatdagi bahsda maydonga tushishi mumkinligi haqida ma’lum qildi.

Ma’lumot uchun, “Manchester Siti” va “Fulhem” bahsi 11-fevraldan 12-fevralga o‘tar kechasi Toshkent vaqti bilan 00:30 da start oladi.

• Abdulla Abduqodirov
• Angliya
• Gvardiola
• Manchester Siti