Qirg‘iziston va Tojikiston chegaradagi vaziyatni barqarorlashtirish va davlatlar o‘rtasida tinchlik o‘rnatish bo‘yicha protokol imzoladi va mojaro hududidan harbiy kuchlarni olib chiqishni boshlashga kelishib oldi. Qirg‘iziston Milliy xavfsizlik davlat qo‘mitasi (GKNB) raisi Qamchibek Tashiyev va Tojikiston Milliy xavfsizlik davlat qo‘mitasi raisi Saymo‘min Yatimovning uchrashuvi yakunlari bo‘yicha Turmush agentligi xabar berdi.

“Tojikiston bilan protokol imzoladik. Protokolning asosiy mohiyati vaziyatni barqarorlashtirish va ikki davlat o‘rtasida tinchlik o‘rnatish, vaziyatni bartaraf etish bo‘yicha ish olib borishdan iborat”, – degan Tashiyev.

Uning ta’kidlashicha, raislarning so‘nggi yig‘ilishidan so‘ng ular “barqarorlik va tinchlik o‘rnatish yo‘lida bir necha qadam tashlagan” va hozirda Botken viloyatidagi vaziyat “asta-sekin barqarorlashmoqda”.

“Vaziyat barqarorlashishiga ishonch bor. Balki ertaga kechqurun yana yig‘ilish o‘tkazarmiz”, – deya qo‘shimcha qilgan Qamchibek Tashiyev.

Qayd etilishicha, tomonlar mojaro hududidan harbiy kuchlarni olib chiqishni boshlash va o‘t ochishni to‘xtatish rejimiga rioya qilishga kelishib oldi. Ikki davlat maxsus xizmatlari rahbarlarining uchrashuvi Tojikistonning So‘g‘d viloyati chegarasida bo‘lib o‘tdi. Qirg‘iziston Milliy xavfsizlik davlat qo‘mitasi matbuot xizmati AKIpress agentligiga xabar berishicha, uning davomida to‘rt nafar qirg‘izistonlik harbiy xizmatchi Bishkekka topshirilgan.

Eslatib o‘tish mumkin, Qirg‘iziston va Tojikiston chegarasida to‘qnashuvlar 14 sentyabr kuni ertalab boshlangan. Keyinroq Bishkek va Dushanbe qo‘shinlarini doimiy joylarga olib chiqishga kelishib oldi. Biroq 16 sentyabr kuni har ikki tomon otishma qayta boshlangani haqida xabar berdi. Qirg‘iziston Sog‘liqni saqlash vazirligi ma’lumotlariga ko‘ra, 31 kishi kasalxonaga yotqizilgan. To‘qnashuvlar Qirg‘izistonning Tojikiston bilan chegaradosh Leylek va Botken tumanlarida sodir bo‘lgan.

• Qirg‘iziston
• Tojikiston
• to'polon