“Netflix” allaqachon “Qora oyna” serial-antologiyasining davomi ustida ishlamoqda. Bu haqda “Variety” xabar bermoqda.

Qayd etilishicha, shou yanada kattaroq va uzunroq bo‘ladi. Yangi mavsumda avvalgidek uch emas, balki ko‘proq epizod bo‘ladi hamda ularning har biri alohida filmga o‘xshaydi.

Premyera sanasi, syujet tafsilotlari va aktyorlar tarkibi haqida batafsil ma’lumot berilmagan. “Netflix” ham bu haqda izoh bermagan.

“Qora oyna”ning 5-fasli 2019 yilda namoyish etilgan. Serial 60 daqiqadan ortiq davom etgan uchta epizodni o‘z ichiga oladi. Ularda Entoni Makki, Endryu Skott va Mayli Sayrus bosh rollarini ijro etgan.

Qayd etish mumkin, “Qora oyna” rejissyor Charli Bruker tomonidan yaratilgan Britaniya ilmiy-fantastik antologiya teleseriali hisoblanadi. Serialning leytmotivi axborot texnologiyalarining inson munosabatlariga ta’siri haqida bo‘lib, har bir serial na syujet, na aktyorlar, na voqeaning vaqti va joyi nutayi nazaridan avvalgilari bilan bog‘liq emas. Brukerning fikricha, barcha syujetlarni zamonaviy jamiyatda keng tarqalgan hayot tarzidagi satiragina birlashtiradi.

Shuningdek, “Qora oyna” nomi har bir uyda uchraydigan elektron gajetlarning qora displeylariga ishoradir.

• Buyuk Britaniya
• Kino
• Serial