Ijtimoiy tarmoqlarda joriy yilning 31-dekabr kuni foydalanishga topshirilgan Samarqand shahridagi yer osti yo‘li devorlaridan kuchli yomg‘ir oqibatida ko‘p miqdorda suv sizib kirayotgani aks etgan videotasvir tarqalmoqda.

Shahar hokimiyati Matbuot xizmati ma’lumotlariga ko‘ra, Ibn Sino va Rudakiy ko‘chalari chorrahasida bunyod etilgan yer osti o‘tish yo‘li uchun 143 milliard so‘m sarflangan.

Ta’kidlash joizki, shahar yo‘l infratuzilmasini yaxshilash, aholi va sayyohlar uchun qulaylik yaratish, transport qatnovi xavfsizligi va barqarorligini ta’minlash maqsadida 143 milliard so‘mlik tonnel – yo‘l o‘tkazgich va Bo‘stonsaroy ko‘chasining Siyob kanali ustidagi yo‘l 68 milliard so‘m mablag‘ hisobiga rekonstruksiya qilindi.

“O‘zbekiston 24” telekanalining mazkur tonnel ochilish marosimidan tayyorlagan lavhasida jurnalistning ta’kidlashicha, obyekt 3 yil davomida qurib bitkazilishi kerak bo‘lgani holda 1,5 yilda bitkazilgan va foydalanishga topshirilgan.

Mazkur qurilish obyektining parametrlari quyidagicha:

– yo‘l o‘tkazgich uzunligi 1 km;

– balandligi 5,8 metr;

– kengligi 26,4 metr;

– yopiq qismining uzunligi 120 metr.

Gidrometeorolog tadqiqotchi Erkin Abdulahatov mazkur mavzuga e’tibor qaratib, buyurtmachi va quruvchilar oldiga qator savollarni qo‘ymoqda.

“Xo‘sh, loyihada hududda kuzatilgan yog‘inlarni xavfsiz va talofatsiz o‘tkazib yuboruvchi drenajlarni qurishda qanday yog‘in miqdori inobatga olingan? O‘zi umuman, qurilish loyihasida tabiy omil ta’sirlari e’tiborga olinganmi?

Hisobga olingan bo‘lsa, nega yangi obyekt devorlaridan suv sizib chiqmoqda? Bahor-yozgi sel-suv toshqin keltirib chiqaradigan haqiqiy intensiv yog‘inlar davrida nima bo‘ladi?” – deb yozadi u.

Shuningdek, u Samarqand kuzatuv meteorologik stansiyasi faoliyati haqida ham to‘xtalib, quruvchi tashkilotlar nega bu kuzatuv stansiyasi ma’lumotlaridan unumli foydalanmaganini tanqid ostiga oladi.

“Samarqand kuzatuv meteorologik stansiyasi o‘z ish faoliyatini boshlaganiga mana salkam 1 asrdan ko‘p vaqt bo‘ldi. U o‘zida hududda kuzatilgan asriy yog‘ingarchilik ma’lumotlarini to‘plab, yig‘ib yotibdi. Ma’lumotlar shu kabi qurilish obyektlarini barpo etish uchun to‘planyapti. Nega chuqurroq tahlil olib borib mukammal obyektlar qurmaysizlar? Sizlarga kim, nima halaqit beryapti?” – deydi tadqiqotchi.

• Ob-havo
• Samarqand
• qiziqarli