Rossiya Federatsiyasi Ta’lim vazirligi migrantlarning farzandlarini maktabga qabul qilishda rus tilini bilish darajasini aniqlaydigan test tartibini ishlab chiqdi. Ushbu testdan o‘ta olmaganlar, qo‘shimcha to‘lovli darslarga borishi kerak. Agarda bola qo‘shimcha darsga qatnashmasa, uning ota-onasi javobgarlikka tortiladi.

Agar bola testni muvaffaqiyatli topshira olmasa, unga rus tilini o‘rganish bo‘yicha qo‘shimcha dastur taklif qilinadi. Dastur uch oy davom etadi va uning xarajatlari ota-ona tomonidan qoplanishi zarur.

Agar bola testni topshira olmaganidan bir oy o‘tib, u qo‘shimcha darslarga qatnashmayotgani aniqlansa, vasiylik organlari chet el fuqarosining uyida tekshiruv o‘tkazadi. O‘z navbatida ular bolaning ota-onasini ma’muriy javobgarlikka tortadi.

2024-yil dekabrda Rossiya Davlat dumasi Rossiya maktablariga rus tilini bilish bo‘yicha testdan o‘ta olmagan migrantlarning farzandlarini maktabga qabul qilishni taqiqlovchi qonunni qabul qilgandi. Qonunga ko‘ra, maktabga qabul qilinishda “bolaning RF hududida qonuniy bo‘lib turgani tekshiriladi”. Migrantlarning farzandlari uchun rus tili testini topshirish bepul bo‘ladi.

.

• Qaror
• Rossiya
• migrant