Rossiya harbiy sudi O‘zbekiston fuqarosini terrorchilik faoliyati bilan shug‘ullangani uchun 15 yilga ozodlikdan mahrum etdi. Sud hukmiga ko‘ra, u dastlabki uch yilni qattiq tartibli yopiq qamoqda o‘taydi.

Sud materiallariga ko‘ra, mazkur shaxs 2023-yilning kuzidan 2024-yil yanvar oyigacha Krasnodar o‘lkasi va Adigeya hududida voyaga yetmagan shaxs bilan yozishmalar olib borgan. U yoshni “Islomiy davlat” (IShID) terroristik tashkiloti safiga qo‘shilishga undagan.

Tergov ma’lumotlariga ko‘ra, ayblanuvchi hibsda bo‘lgan paytda ham radikal targ‘ibotdan to‘xtamagan. U o‘z kameradoshini IShID faoliyatini “to‘g‘ri yo‘l” sifatida qabul qilishga ishontirishga harakat qilgan.

Rossiya qonunchiligiga muvofiq, uning qilmishi terrorchilik faoliyatini targ‘ib qilish va unga jalb qilish sifatida baholangan.

• IShID
• Jazo
• O‘zbekistonlik
• Rossiya