“Toshkent-AERO” ixtisoslashtirilgan bojxona kompleksi Kontrabandaga qarshi kurashish shu’basi xodimlari tomonidan giyohvandlik vositalarining noqonuniy aylanishiga qarshi navbatdagi tezkor-qidiruv tadbiri o‘tkazildi.

Joriy yilning 3 avgust kuni poytaxtimizda o‘tkazilgan tezkor tadbir davomida oldindan kuzatuvga olingan shaxs boshqaruvidagi avtotransport vositasi to‘xtatilib, xolislar ishtirokida ko‘zdan kechirildi. Tekshiruv davomida avtomashina salonidagi bolalar sharbatiga mo‘ljallangan bir dona quti ichidan 20 o‘ramda, umumiy og‘irligi qariyb 11 gramm bo‘lgan giyohvandlik vositalari aniqlandi.

Holatning kelib chiqishi va narkojinoyatning boshqa ishtirokchilarini aniqlash maqsadida bojxona organlari tomonidan Davlat xavfsizlik xizmati hamda ichki ishlar idoralari vakillari jalb etilgan holda tezkor-qidiruv tadbirlari davom ettirildi.

Fuqaroning yashash xonadoni xolislar ishtirokida ko‘zdan kechirilganda, u yerda ham geroin, mefedron, marixuana va boshqa turdagi an’anaviy hamda sintetik giyohvandlik vositalari borligi aniqlandi. Ularning umumiy og‘irligi 3,15 kilogrammni tashkil etdi.

Tezkor-qidiruv tadbirlarining keyingi bosqichida mazkur giyohvandlik vositalarining asl egasi ham aniqlanib, qo‘lga olindi.

Hozirda ushbu holat yuzasidan bojxona organlari tomonidan jinoyat ishi qo‘zg‘atilgan. Tergovga qadar tekshiruv va tergov harakatlari davom etmoqda.