“Maxa.dxb” taxallusi bilan Qozog‘istonda faoliyat yuritgan o‘zbekistonlik bloger Mahmud Hikmatov noqonuniy internet-kazinolarni targ‘ib qilishda ayblanib, xalqaro qidiruvga berildi. Bu haqda Qozog‘iston Moliyaviy monitoring agentligi ma’lum qildi.

Qozog‘iston sudi 2000-yilda O‘zbekistonda tug‘ilgan Mahmud Hikmatovga nisbatan qamoqqa olish tarzidagi ehtiyot chorasini tanlagan.

Tergov ma’lumotlariga ko‘ra, Qozog‘iston hududida 5 dan ortiq noqonuniy onlayn qimorxonalar faoliyatini ta’minlash, pul mablag‘larini qabul qilish va to‘lash, shuningdek, fuqarolarni qimor o‘yinlariga jalb qilish uchun reklama tarqatilgan.

Qayd etilishicha, noqonuniy qimor o‘yinlarini targ‘ib qilish uchun tashkilotchilar Hikmatovni jalb qilgan. Unga Qozog‘istonda faoliyat yurituvchi inflyuyenserlarni topish va ular orqali reklama kontentlarini joylashtirishni tashkil etish vazifasi yuklatilgan.

Agentlik ma’lumotiga ko‘ra, Hikmatov 35 nafardan ortiq blogerni hamkorlikka jalb qilgan. Ular orasida bloger Hamza Q. ham bo‘lgan.

Hamza Q. internet-kazinolarga referal havolalar joylashtirib, foydalanuvchilarni taqiqlangan qimor faoliyatiga jalb qilgan va har bir havola orqali o‘tgan foydalanuvchi uchun mukofot olgan.

Ma’lum qilinishicha, Hamza Q. joriy yilning 6-avgust kuni Vetnamdan Qozog‘istonga ekstraditsiya qilingan.

Hozirda Mahmud Hikmatovga nisbatan tergov harakatlari davom etmoqda.