Kanadada yosh bola xavfsizlik kamarini taqishdan bosh tortgani sababli yo‘lovchi samolyotining parvozi bekor qilindi. Hodisa oqibatida barcha yo‘lovchilar keyingi kungi reysga qayta joylashtirildi.

Voqea 6-avgust kuni Porter Airlines aviakompaniyasining Viktoriya shahridan Toronto tomon uchishi kerak bo‘lgan samolyotida sodir bo‘lgan. Parvozga tayyorgarlik vaqtida bola o‘z o‘rnida tik turgan va xavfsizlik kamarini taqishdan bosh tortgan.

Bolaning ota-onasi va ekipaj a’zolari uni kamar taqishga ko‘ndirishga harakat qilgan, biroq urinishlar samara bermagan. Shundan so‘ng ekipaj samolyotni terminalga qaytarib, bola va uning ota-onasini bortdan tushirgan.

Aviakompaniya bunday sharoitda samolyotning xavfsiz parvoz qilishi mumkin emasligini bildirgan. Parvozning kechikishi sababli samolyot yarim tunda uchish-qo‘nish yo‘lagi yopilgunga qadar havoga ko‘tarila olmagan. Natijada yo‘lovchilar keyingi kungi reysga o‘tkazilgan.

Mutaxassislarning ta’kidlashicha, xavfsizlik kamarini taqmagan bola kuchli turbulentlik vaqtida jiddiy jarohat olishi yoki boshqa yo‘lovchilarga urilishi mumkin.

Yo‘lovchilardan biri Ariye Kozuchning aytishicha, bola bezovtalik qilmagan, aksincha, qo‘rqib ketgandek ko‘ringan. Uning so‘zlariga ko‘ra, bola o‘rindiq ostiga yashiringan va uni kamar bilan bog‘lashga urinishganda yana o‘rindiq ostiga kirib ketgan.

Voqea ijtimoiy tarmoqlarda turli munozaralarga sabab bo‘ldi. Ayrimlar ota-onalar farzandining xatti-harakatini qat’iyroq nazorat qilishi kerakligini aytgan bo‘lsa, boshqalar bolalar samolyotdan qo‘rqishi yoki xavfsizlik kamarini taqishga qiynalishi mumkinligini ta’kidlagan.