Polshaning Lomja shahrida uch nafar qo‘shni 5-qavatdagi balkondan yiqilgan 4 yoshli qizni yopinchiq yordamida tutib qolib, uning hayotini saqlab qoldi.

Voqea 9-avgust kuni tushdan keyin sodir bo‘lgan. Qo‘shnilar binoning 5-qavatidagi balkon chetida osilib turgan qizni ko‘rib qolgan. Qutqaruv xizmatlari yetib kelguniga qadar uch nafar erkak qiz tushishi mumkin bo‘lgan joyga yopinchiqni yoyib, uni yiqilgan vaqtida tutib qolgan.

Voqea kuzatuv kameralariga ham tushgan. Politsiya ma’lumotlariga ko‘ra, qo‘shnilarning tezkor harakati tufayli fojianing oldi olingan.

Qiz shifoxonaga olib borilgan. Shifokorlar uning tanasida yengil ko‘karishlar aniqlanganini, hozirda ahvoli barqaror ekanini bildirgan.

Dastlabki ma’lumotlarga ko‘ra, voqea vaqtida qizning onasi uxlayotgan bo‘lgan, otasi esa chet elda ishlayotgan bo‘lgan. Keyinchalik onaning qonida 0,7 promille miqdorida alkogol aniqlangan.

Hozirda holat yuzasidan tergov davom etmoqda. Agar ona farzandini o‘lim yoki og‘ir jarohat olish xavfi ostida qoldirishda aybdor deb topilsa, unga 5 yilgacha qamoq jazosi tayinlanishi mumkin.