“Delfin” tayfuni Xitoyning sharqiy qirg‘oqlariga yetib kelib, kuchli yomg‘ir, suv toshqini va ko‘chki xavfini yuzaga keltirdi. Shu sababli 1 milliondan ortiq aholi xavfsiz hududlarga evakuatsiya qilindi.

“Reuters” xabariga ko‘ra, “Delfin” bu yil Xitoy hududiga yetib kelgan eng kuchli tropik siklon bo‘lib, 9-avgust kuni soat 17:30 atrofida Chjetszyan provinsiyasining Yuyxuan shahri yaqinidan quruqlikka chiqqan.

Tayfun qirg‘oqqa yetib kelgan vaqtda shamol tezligi 151 km/soatgacha yetgan. Sinoptiklar Chjetszyan, Shanxay va boshqa bir qator hududlarda kuchli yomg‘ir yog‘ishini prognoz qilgan.

Chjetszyanning markaziy va sharqiy hududlarida 250–500 millimetrgacha yog‘ingarchilik kuzatilishi mumkin. Bu esa suv toshqini va ko‘chki xavfini oshirmoqda.

Tayfun sabab transport qatnovlari ham jiddiy cheklangan. Shanxayda 30 mingdan ortiq kishi evakuatsiya qilingan, qariyb 1 500 ta aviaqatnov bekor qilingan.

Qo‘shni Chjetszyan provinsiyasining Venchjou shahrida esa 900 mingdan ortiq aholi xavfsiz hududlarga ko‘chirilgan va 1 000 dan ziyod favqulodda boshpana tashkil etilgan.

Futszyan provinsiyasida ham qariyb 99 ming kishi evakuatsiya qilingan. Dengizdagi parom qatnovlari to‘xtatilgan, qurilish loyihalari vaqtincha bekor qilingan va yuzlab kemalar xavfsiz hududlarga olib chiqilgan.

Meteorologlarning prognoziga ko‘ra, tayfun Xitoyning markaziy va janubi-g‘arbiy hududlari tomon harakatlanib, asta-sekin kuchsizlanadi. Biroq kuchli yog‘ingarchilik davom etishi sababli suv toshqini va ko‘chki xavfi saqlanib qoladi.

Avvalroq “Delfin” tayfuni Yaponiyaning Okinava prefekturasiga ham yetib kelib, 6 kishining jarohatlanishiga sabab bo‘lgani va 50 mingdan ortiq xonadon hamda binolar elektr ta’minotidan uzilgani xabar qilingandi.