Prezident Shavkat Mirziyoyev bugun qutlug‘ 75 yoshga to‘lgan O‘zbekiston xalq artisti Sherali Jo‘rayevni “El-yurt hurmati” ordeni bilan mukofotlash to‘g‘risidagi farmonni imzoladi.

Davlat rahbari ushbu sana munosabati bilan hofizga tabrik ham yo‘lladi. 

“El-yurtimiz Sizni butun hayotini o‘zbek madaniyati va san’atini rivojlantirishga bag‘ishlagan, o‘z ijodiy maktabini yaratgan ulkan va betakror iste’dod egasi, fidoyi va millatparvar shaxs sifatida yaxshi biladi va yuksak qadrlaydi”, – deyiladi tabrikda.  
Sherali Jo‘rayev 50 yildan ziyod ijodi davomida “O‘zbegim”, “Sohibqiron”, “Egasi bor yurt”, “Karvon”, “Sarbon”, “Inson qasidasi” kabi 600 ga yaqin qo‘shiq yaratgan. Uning “Birinchi muhabbatim”, “Yoshligimiz”, “Oy yuzingga”, “Oshiqlar sardori”, “Do‘st bo‘lsang, yonimda tur” kabi ashulalari xalq qo‘shiqlariga aylanib ketgan.

Xonanda mumtoz shoirlar g‘azallarini kuyga solib, xalq merosini yosh avlodga va jahonga tanitishga ulkan hissa qo‘shgan. 

Sherali Jo‘rayev 1981-yilda “O‘zbekistonda xizmat ko‘rsatgan artist”, 1987-yilda “O‘zbekiston xalq artisti” faxriy unvonlari, 2018-yilda “Fidokorona xizmatlari uchun” ordeniga sazovor bo‘lgan.

• Mukofot
• O‘zbekiston
• Prezident
• Shavkat Mirziyoyev
• Sherali Jo‘rayev