Eronda Sepehran Airlines aviakompaniyasining Boeing 737 samolyoti havoga ko‘tarilganidan ko‘p o‘tmay shinalaridan biri yorilib, favqulodda qo‘nishga majbur bo‘ldi. Hodisa 15-sentyabr kuni sodir bo‘lgan.

Samolyot Mashhaddan Kirmonshohga uchayotgan bo‘lgan. Dastlabki ma’lumotlarga ko‘ra, havoga ko‘tarilish vaqtida shinalardan biri yorilgan. Keyinchalik dvigatellardan birida ham nosozlik yuzaga kelgani xabar qilingan.

Uchuvchi favqulodda holat e’lon qilib, samolyotni Mashhad xalqaro aeroportiga qaytargan. Uchoq muvaffaqiyatli qo‘ngan va yo‘lovchilar hamda ekipaj a’zolaridan hech kim jabrlanmagan.

Ijtimoiy tarmoqlarda tarqalgan videolarda samolyot kuchli tebranayotgani, salonning ayrim qismlari ajralib tushgani va yuk javonlaridagi buyumlar sochilib ketgani ko‘rinadi.

Hodisadan so‘ng aeroportdagi uchish-qo‘nish yo‘lagining biri vaqtincha yopilgan. Yo‘lovchilar boshqa samolyot orqali Kirmonshohga yetkazilgan.

Nosozlikning aniq sababi hozircha ma’lum qilinmagan.