AQSHda 36 yoshli ayol sud qarori bilan farzandining otasiga berilishi belgilanganidan so‘ng 11 oylik o‘g‘lini olib qochib, unga o‘q uzgan. Bu haqda “The New York Post”ga tayanib, “Zakon.kz” xabar berdi.

Ma’lum qilinishicha, Medlin Veronika Deyli vasiylik masalasidagi sud qaroridan norozi bo‘lgan. Shundan so‘ng u o‘g‘lini Vayoming shtatidan Nyu-Meksiko shtatiga olib qochgan.

Huquq-tartibot idoralari xodimlari ayolni Silver-Siti shahri yaqinidagi avtofurgonlar turargohidan aniqlagan. Politsiya uning furgon ichiga yashiringanini ko‘rib, hududni o‘rab olgan va ichkariga kirish uchun tegishli orderni kutgan.

Tergov davomida Deyli farzandini otasi va uning qarindoshlaridan “himoya qilgani” uchun qilgan ishidan afsuslanmasligini bildirgan. U bolaning otasi farzandiga yetarlicha e’tibor va mehr ko‘rsatmaganini da’vo qilgan.

Sud jarayonida ayol o‘z aybiga iqror bo‘lgan. Prokurorlar unga eng og‘ir jazo — umrbod ozodlikdan mahrum qilish jazosi tayinlanishi mumkinligini bildirgan.