Ukraina Prezidenti Vladimir Zelenskiy Rossiya uning prezidentlik samolyoti Moldova havo hududida bo‘lgan vaqtda ikki marta dron uchirganini aytdi. Bu haqda u CBS News telekanaliga bergan intervyusida ma’lum qildi.

Zelenskiyning so‘zlariga ko‘ra, dronlar Moldova hududiga uchirilgan. U Rossiya bu orqali uni qo‘rqitishga uringan bo‘lishi mumkinligini bildirgan.

Ukraina prezidenti, shuningdek, Rossiya Moldova, Ruminiya va ayrim hollarda Polsha havo hududlarida ham shunga o‘xshash harakatlarni amalga oshirayotganini ta’kidladi.

Avvalroq, 9-sentyabr kuni Norvegiya bosh vaziri Yonas Gar Styore Zelenskiyning Moldovadan Osloga uchayotgan samolyoti dron bilan to‘qnashishiga oz qolganini aytgandi. Ukraina prezidenti ofisidagi manba esa bu bayonotni “mubolag‘a” deb atagan.

Moldova ma’lumotlariga ko‘ra, o‘sha kuni mamlakat havo hududida dron aniqlangan va keyinchalik u Kishinyovdan qariyb 160 kilometr uzoqlikda portlagan. Shundan so‘ng parvozlar uchun joriy etilgan cheklovlar bekor qilingan.