Isroil Suriyani yana o‘qqa tutdi

Isroil 22-avgust kuni Suriya janubiga zarba berib, buni “terrorchi”ni yo‘q qilish amaliyoti deb atadi. Damashq esa havo hududi ochiqdan-ochiq buzilganini ta’kidlab, hujumni keskin qoraladi. Bu haqda Reuters xabar berdi.

Suriya Tashqi ishlar vazirligiga ko‘ra, dron Beyt Jinn qishlog‘i yaqinidagi yo‘lda ketayotgan tinch aholi avtomobiliga qarata o‘t ochgan. Oqibatda fuqarolar jarohatlangan, davlat televideniyesi esa kamida bir kishi jarohat olganini bildirgan.

Isroil hujum uning askarlariga bevosita tahdid solayotgan shaxsga qarshi yo‘naltirilganini da’vo qilgan. Biroq qanday qurol va vositalardan foydalanilganiga aniqlik kiritmagan.

Ikki mamlakat o‘rtasidagi vaziyat 18-avgust kuni Isroilning Abu ad-Duxur aviabazasiga bergan zarbalaridan so‘ng yanada keskinlashdi. Binyamin Netanyaxu idorasi ushbu amaliyot Turkiya harbiylarining bazaga joylashishiga yo‘l qo‘ymaslik maqsadida o‘tkazilganini bildirdi.

Rasmiy Anqara esa o‘z qo‘shinlarini ushbu obyektga yuborish rejalashtirilmaganini ta’kidladi. AQSH prezidentining Suriya bo‘yicha maxsus vakili Tom Barrak aviabazaga hujumni “keraksiz eskalatsiya” deb atadi. Isroilning sobiq mudofaa vaziri Moshe Ya’alon esa hujum sababli Binyamin Netanyaxuni hokimiyatdan chetlatishga chaqirgan.