Qashqadaryo viloyati Qamashi tumanidagi Odirmon shahar arxeologik yodgorligida olib borilgan qazishmalar davomida diniy marosimlar bilan bog‘liq altar (mehrob) va noyob ostodon aniqlandi. Bu haqda Madaniy meros agentligi xabar berdi.

Arxeologik tadqiqotlar joriy yilda ilk bor Samarqand arxeologiya instituti xodimi Sanjar Abduraximov tomonidan olib borilmoqda. Yodgorlikning shimoli-sharqiy qismidan topilgan altarning balandligi 70 santimetr, eni 90 santimetrni tashkil etadi. Unda yong‘in izlari yaxshi saqlangan.

Inshootning pol qismiga pishgan kafelsimon g‘ishtlar terilgan, atrofi esa loy suvoq bilan qoplangan. Suvoq qatlamlarining bir necha bor yangilangani altardan uzoq vaqt davomida foydalanilganini va u muntazam ta’mirlanganini ko‘rsatadi.

Yodgorlikdan topilgan ostodonning tashqi qismida kiyik va archa daraxtiga o‘xshash naqshlar aks etgan. Mutaxassislar tasvirlarning mazmunini restavratsiya ishlari yakunlangach batafsil o‘rganishni rejalashtirmoqda.

Dastlabki xulosalarga ko‘ra, Odirmon shahar yodgorligi miloddan avvalgi III asr va milodiy III asrlar oralig‘iga oid. Arxeologlarning fikricha, altar va ostodon qadimgi aholining diniy qarashlari, marosimlari hamda dafn an’analarini o‘rganishda muhim manba bo‘lib xizmat qiladi.

Mutaxassislar arxeologik tadqiqotlarni davom ettirish orqali yodgorlikning tarixiy va madaniy ahamiyatini yanada chuqurroq o‘rganishni maqsad qilgan.