Qozog‘istonga kirish uchun pulli elektron ruxsatnoma - vaziyat haqida nimalar ma’lum?

Internetda noyabr oyidan boshlab, vizasiz mamlakatlar fuqarolari uchun Qozog‘istonga kirishga pulli elektron ruxsatnoma joriy etilishi to‘g‘risida ma’lumotlar tarqaldi. Bunday qonun loyihasi mavjud, ammo u hali qabul qilinmagan. Ruxsatnomaning pulli bo‘lish-bo‘lmasligi ham hali hal etilmagan. Elektron ruxsatnoma berish tizimining o‘zi yanvar oyidan beri sinov rejimida ishlamoqda, lekin undan foydalanish majburiy emas.

Avgust oyi oxirida Qozog‘istonga kirish uchun pulli ruxsatnoma joriy etilishi va bu o‘zbekistonliklarga ham taalluqli bo‘lishi haqida xabarlar paydo bo‘ldi. Xorijliklar uchun elektron ruxsatnomani joriy etish masalasi ishlab chiqilayotgani davlat rahbari imzolagan qonun hamda respublika IIV loyihasidan ma’lum edi, ammo bu loyiha hozircha korrupsiyaga qarshi ekspertiza bosqichida turibdi. Ruxsatnomaning pulli bo‘lish-bo‘lmasligi ham hali hal etilmagan. Elektron ruxsatnoma berish tizimining o‘zi yanvar oyidan beri sinov rejimida ishlamoqda, lekin undan foydalanish majburiy emas.

Serbiya Tashqi ishlar vazirligi xabari muhokamalarga sabab bo‘ldi

Serbiya Tashqi ishlar vazirligi (TIV) ushbu tizim to‘g‘risida rasmiy xabar berdi va u bahs va munozaralarga sabab bo‘ldi. Xabarga ko‘ra, pulli elektron ruxsatnoma tizimi Qozog‘istonda 25-avgustdan 1-noyabrgacha sinov rejimida ishga tushiriladi. Shu davrda xorijliklar Qozog‘istonga elektron ruxsatnomasiz (QazETA) ham kiritiladi, biroq ular yangi qoidalar haqida ogohlantirilishi lozim.

Serbiya TIV xabariga ko‘ra, 1-noyabrdan boshlab samolyotda keluvchilar uchun ruxsatnoma olish majburiy bo‘ladi. 15-noyabrdan YEOII a’zosi bo‘lmagan davlatlar (jumladan, O‘zbekiston) bilan chegaradagi avtomobil nazorat-o‘tkazish punktlari orqali kirishda QazETA talab etiladi. 30-noyabrdan esa bu qoidalar YEOII a’zolari, jumladan, Rossiya tomonidan kirish uchun ham qo‘llanadi. 15-dekabrdan e’tiboran Qozog‘istonga poyezd va dengiz orqali keluvchilardan ham QazETA talab qilinadi.

Serbiya TIV xabarida ta’kidlanishicha, ruxsatnomani mamlakatga kirishdan kamida 72 soat oldin onlayn tarzda olish mumkin va u 180 kunga beriladi. QazETA oldindan rasmiylashtirilganda uning narxi taxminan 3900 tenge (7,3 yevro), chegarada rasmiylashtirilganda esa 7800 tenge (14,6 yevro) bo‘lishi kutilmoqda.

Qozog‘iston hukumati mamlakatga kirish uchun elektron ruxsatnoma haqida nima degan edi?

24-iyun kuni Qozog‘iston prezidenti Qosim-Jo‘mart To‘qayev migratsiya to‘g‘risidagi qonunchilikka o‘zgartirishlar kiritishni nazarda tutuvchi qonunni imzoladi. Unda, jumladan, mamlakatga kirish uchun elektron ruxsatnoma haqida so‘z borib, buning uchun to‘lov undirilishi ham qayd etilgan. «Xorijiy fuqarolar va fuqaroligi bo‘lmagan shaxslarning Qozog‘iston Respublikasiga kirishi mamlakatga kirish uchun elektron ruxsatnoma asosida amalga oshiriladi», - deyilgan qonunda. To‘lov tartibi va miqdorini Qozog‘iston hukumati belgilashi kerak.

Prezident imzolagan hujjat e’lon qilinganidan 60 kun o‘tib kuchga kirishi kerak edi. Avgust oyi boshida Qozog‘istonning qonun loyihalari e’lon qilinadigan «Otkrytyye NPA» saytida mamlakat Ichki ishlar vazirligi xorijliklar uchun pullik elektron kirish ruxsatnomasini rasmiylashtirishni ko‘zda tutuvchi tuzatishlarni e’lon qildi, biroq uning narxiga aniqlik kiritilmagan. Idora tizimni 2026-yilning avgustidan dekabrigacha bosqichma-bosqich joriy etishni rejalashtirgan. Loyihaning ommaviy muhokamasi 20-avgustgacha davom etdi, 31-avgust kuni esa onlayn muhokama o‘tkazildi.

Shu bilan birga, xorijiy fuqarolar uchun mo‘ljallangan QazETA raqamli platformasi yanvar oyidayoq sinov tariqasida ishga tushirilgan edi. Qozog‘istonning Rossiyadagi elchixonasi yanvar oyidagi xabarida aytilishicha, u orqali Qozog‘iston bilan vizasiz rejim amal qiladigan mamlakatlar (jumladan, O‘zbekiston) fuqarolari uchun ham elektron kirish ruxsatnomasini rasmiylashtirish mumkin. Biroq, ETA (Electronic Travel Authorization) olish hozircha «tavsiyaviy xususiyatga» ega bo‘lib, uni bosqichma-bosqich joriy etish sinov loyihasi yakunlanganidan so‘ng rejalashtirilmoqda. Ruxsatnoma olish uchun safardan kamida 72 soat oldin ariza topshirish kerak va u 180 kun davomida amal qiladi.

25-avgust kuni, ya’ni To‘qayev imzolagan qonun e’lon qilinganidan 60 kun o‘tgach, ijtimoiy tarmoqlarda mamlakatda yangi migratsiya qonunchiligi amalga oshirila boshlangani haqida xabarlar paydo bo‘ldi.

Shu bilan birga, Qozog‘iston hukumati hozircha samolyot, avtomobil va poyezdda chegarani kesib o‘tuvchilar uchun yangi kirish rejimi hamda uning majburiy tartibini joriy etish muddatlari haqida hech qanday e’lon bermadi.

Qozog‘istonga kirish o‘zbekistonliklar uchun pullik bo‘ladimi?

Bu haqda rasman xabar berilmadi. Qozog‘iston Ichki ishlar vazirligi TASS agentligiga to‘lovni joriy etish masalasi «ochiq qolayotganini» ma’lum qildi; shartlar va tafsilotlar qoidalar kuchga kirgach e’lon qilinadi.