Sirdaryo viloyatidagi 398 ta xususiy bog‘chada o‘tkazilgan sanitariya tekshiruvlarida qator qoidabuzarliklar aniqlandi. Bu haqda O‘zA xabar berdi.

Tekshiruvlarda bolalarga yaratilgan shart-sharoitlar sanitariya talablariga javob bermasligi ma’lum bo‘ldi. Xususan, 60 ta bog‘chaning oshxonasi ta’mirtalab holda ekani, suv ta’minotida uzilishlar borligi, qo‘l yuvish uskunalari yetarli darajada jihozlanmagani aniqlangan.

Shuningdek, ayrim muassasalarda xodimlar va bolalar belgilangan muddatlarda tibbiy ko‘rikdan o‘tmagani, yotoq choyshablari eskirgani, ayrim xonalar va eshiklar ta’mirtalab ekani qayd etilgan.

Kamchiliklar asosida bir qator bog‘chalar faoliyati vaqtincha to‘xtatilgan. Mas’ullar kamchiliklarni bartaraf etib, bolalar uchun sog‘lom va xavfsiz muhit yaratishi maqsadida shunday chora ko‘rilgan.

“Tekshiruv natijalariga ko‘ra, sanitariya talab va me’yorlarini buzgan 329 nafar mas’ul shaxsga nisbatan sud organlari tomonidan umumiy 333 million 480 ming so‘m miqdorida ma’muriy jarimalar qo‘llanildi”, – deydi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasining Sirdaryo viloyati boshqarmasi boshlig‘i Jo‘rabek Hasanov.​

Hozirda aniqlangan kamchiliklarni bartaraf etish bo‘yicha maxsus ishchi guruhlar tashkil etilgan.

• Bolalar bog‘chasi
• Qoidabuzarlik
• SSV
• Sanitariya
• Sirdaryo
• tekshiruv