8-avgust kuni Krishtianu Ronalduning minglab muxlislari OAV xabarlariga ishonib, Portugaliyaning Madeyra orolida butunlay boshqa juftlikning to‘yiga yig‘ilib qoldi. Bu haqda “The Touchline” xabar berdi.

Avvalroq Krishtianu Ronaldu va Jorjina Rodrigesning nikoh to‘yi bo‘lishi haqida xabarlar tarqalgan, hatto to‘y sanasi va joyi ham e’lon qilingandi.

Shu sababli belgilangan kuni sobor oldiga Ronalduning muxlislari va qiziquvchilar to‘planib, mashhur juftlikning to‘yini kutgan.

Kelinni olib kelgan eski “Rolls-Royce” sobor oldiga kelganida esa olomon mashinani o‘rab olgan. Ayrim muxlislar Ronalduning futbolkasi va uning surati tushirilgan niqoblarda kelgan.

Biroq kelin mashinadan tushganida mehmonlardan biri olomonni tinchlantirib: “Bu Jorjina emas”, degan.

Keyinchalik ma’lum bo‘lishicha, soborda Fransiyada yashovchi madeyralik juftlik — Fabio Ramos va Fatima Nikol Kunya Teysheyra turmush qurayotgan bo‘lgan.

Yangi turmush qurganlarning qarindoshlari va do‘stlari marosimga kirish uchun Ronalduning muxlislari to‘plangan olomon orasidan o‘tishga majbur bo‘lgan.

Sobor ruhoniysi Markos Gonsalvesh ham mazkur to‘yning Ronaldu va Jorjina bilan hech qanday aloqasi yo‘qligini tasdiqlagan.

Shunga qaramay, Ronalduning muxlislari boshqa juftlikning to‘y marosimiga xalaqit bermagan.

Ma’lumot uchun, Krishtianu Ronaldu va Jorjina Rodrigesning avgust oyida turmush qurishi haqida xabarlar tarqalgan edi. Biroq juftlik hozircha to‘y sanasi va joyini rasman e’lon qilmagan.