Surxondaryoda MCHJni qasddan bankrotlikka olib kelish holati ma’lum bo‘ldi. Bu haqda Iqtisodiy jinoyatlarga qarshi kurashish departamenti xabar berdi.

Qayd etilishicha, Departamentning Surxondaryo viloyati boshqarmasi tomonidan tergovga qadar tekshiruv o‘tkazilgan. Unda “P.T.” MCHJ rahbari A.T. va boshqalar MCHJning 841,8 mln so‘m debitorlik qarzdorligi mavjud bo‘lsa-da, MCHJni to‘lovga qobiliyatsiz deb topish va tugatishga doir ish yuritish jarayonida ushbu ma’lumotlarni yashirib kelgan. Shuningdek, Termiz tumanlararo Iqtisodiy sudining tugatish to‘g‘risidagi ajrimiga asosan 369,9 mln so‘m soliq qarzini hisobdan chiqarib yuborgan.

Natijada soliq va boshqa majburiy yig‘imlarni to‘lashdan bo‘yin tovlab, MCHJni qasddan to‘lovga qobiliyatsizligiga (bankrotlikka) olib kelganliklari aniqlangan.

Ushbu holat yuzasidan Jinoyat kodeksining 184-moddasi (soliqlar yoki yig‘imlarni to‘lashdan bo‘yin tovlash) va 181-1-moddasi (qasddan bankrotlikka olib kelish) bilan jinoyat ishi qo‘zg‘atilib, tergov harakatlari o‘tkazilmoqda.

• Jinoyat
• Soliq
• To'lov